Suteek eragindako kalteei aurre egiteko laguntza eske Nafarroatik

ErriGora elkarteak "lurra, sua, ura, herria" izeneko kanpaina jarri du abian, Nafarroan suak eragindako kalteei aurre egiteko dirua batzeko. ErriGorak euskara eta nezakaritza sustatzen ditu eta MONDRAGONeko kooperatibisten babesa jaso izan du urte luzez.

2022/07/11

Basoak, zereal-lurrak, olibadiak, mahastiak… Nafarroan inoiz erregistratutako sute handienek 15.000 hektarea inguru kiskali dituzte ekainean. Zalantzarik gabe, hondamendia izan da Nafarroako nekazari askorentzat. Suhiltzaile, basozain, nekazari, abeltzain eta herritarren arteko auzolana erabakigarria izan da erabateko tragedia sahiesteko. Eta bertatik, orain ere, herritarren ordua dela sinetsita, diru-bilketa abiatu dute, uztailaren 15era arte, auzolanak etenik izan ez dezan.

Unearen larritasuna ulertuta, Errigorak 10.000 euro jarri ditu, eta euskal herritarrei haien ekarpena egiteko eskatzen diete, bereziki MONDRAGONeko kooperatibistei, nork bere ahalaren neurrira, lurra bestela kudeatuko duten proiektuak sustatzeko.

Lurrak ematen duena ahora eramateko aukera eskaintzen du ErriGorak, https://www.errigora.eus/ Nafarroako erdialdeko eta hegoaldeko lur emankorretako fruitu onak batu eta saldu, ahotik ahora euskara dantzan jarriz. Hori da ErriGora. Nafarroan, bereziki erdialde eta hegoaldean, euskara eta nekazaritza sustatzen diharduen egitasmoa.

Nola lagundu

Bere ekarpena egin nahi duen orok, oso erraz egin dezake. ErriGora elkartean aurkituko du informazio guztia, baita dirua nola kudeatuko den ere.