MONDRAGONek ekonomia zirkularraren arloko gaitasunak eta praktika onak partekatu ditu Circular Week 2026 ekimenean

MONDRAGONek Circular Week 2026 ekimenean parte hartu zuen, industria-ekosistemek ekonomia zirkularra eskala handian sustatzeko egin dezaketen ekarpena erakusteko saio baten bidez. Circular Economy as a New Reality: How Industrial Ecosystems Enable Circular Economy at Scale izenburupean, topaketak ingurune kooperatiboan garatutako hainbat esperientzia eta irtenbide bildu zituen, ekoizpen- eta kontsumo-eredu zirkularragoetarantz aurrera egiteko.

Jardunaldian, hainbat kooperatibatako, Mondragon Unibertsitateko fakultateetako eta MONDRAGONeko zentro teknologikoetako profesionalek hartu zuten parte. Digitalizazioaren, produktuen diseinuaren, haien bizitza erabilgarriaren luzapenaren, materialen berreskurapenaren eta hondakinen prebentzioaren arloetako jardunbide egokiak eta gaitasunak partekatu zituzten.

Jardunaldiko argazki-galeria: https://flic.kr/s/aHBqjD8Ssy

Jardunaldi osoa bideoan: https://l.mndrgn.com/9x7qk

Ekonomia zirkularra sustatzeko irtenbideak

Jardunaldia Carolina Mejia MONDRAGON Corporationeko ordezkariaren hitzartzearekin hasi zen. Mejíak zirkulartasuna sustatzeko industria-ekosistemen eraikuntza aztertu zuen, baita lankidetza kooperatiboak gaitasunak konektatzeko eta industria-eskalan irtenbideak garatzeko duen eginkizuna ere.

Ondoren, Circular Replayko Jorge de Antoniok produktuen pasaporte digitalen eta negozio-eredu zirkularren aukerak aurkeztu zituen. Bestalde, Circular Replayko Maria Fernanda Lardizabalek, Copreciren ordezkari gisa, LIFE WEEELoop proiektuaren esperientzia azaldu zuen, bizitza erabilgarriaren amaierara iritsitako sukalde-plaketako osagaiak berreskuratu eta berrerabiltzeari dagokionez.

Birmanufakturaren bidez produktuen bizitza erabilgarria luzatzea izan zen Circular Replayko Daniel de la Torreren hitzaldiaren ardatza, Motorlanen ordezkari gisa. Ildo beretik, Mondragon Unibertsitateko Goi Eskola Politeknikoko Idoia Urainek hainbat industria-sektoretan birmanufaktura sustatzeko metodologiak eta esperientziak aurkeztu zituen, automobilgintzari arreta berezia eskainiz.

Robotikaren bidez balio handiko osagai elektronikoak berreskuratzea izan zen Lortekeko Oihane Bañalesen aurkezpenaren gaia. Ondoren, Mondragon Unibertsitateko MIK ikerketa-zentroko Unai de Vicentek itsas plastikoen berreskurapena eta balio-kate zirkular berriak garatzeko aukerak aztertu zituen.

Azkenik, Ausolaneko Edurne Clementek eta Nagore Saleguik GUSTOS proiektuaren esperientzia azaldu zuten. Eskola-jantokietan elikagaiak alferrik galtzea prebenitzeko ekimen horrek berrikuntza, hezkuntza eta kontsumo-ohituren aldaketa uztartzen ditu. Galdera-erantzunen txandarekin amaitu zen saioa.

Nazioarteko topaketa, formatu hibridoan

Saioa ingelesez egin zen, formatu interaktiboan, online zein aurrez aurre. Aretxabaletako HUHEZIko instalazioetatik online eman zen, 10:00etatik 12:30era, eta benetako industria-esperientziak ezagutu nahi zituen Europako publikoari zuzenduta egon zen.

Horrela, MONDRAGONek ekonomia zirkularraren arloko gaitasunak eta jardunbide egokiak nazioarteko publikoari hurbildu dizkio, bere kooperatibetan, unibertsitatean eta zentro teknologikoetan bultzatutako ekimenak partekatuz.

Topaketa Circular Week 2026 ekimenaren barruan egin zen; urriaren 26tik 31ra bitartean ospatzen da ekimena. Jardunaldiak zirkulartasuna industria- eta enpresa-prozesuetan txertatzeko proposamenak partekatzeko aukera eman du. Lankidetza, berrikuntza teknologikoa eta negozio-eredu berrien garapena funtsezko elementuak dira jardunbide horiek zabaltzeko eta ekonomia zirkularrago baterantz aurrera egiteko.