Milaka elkartasun pauso Mundukideren alde

Kooperatiben arteko VI. lasterketa solidarioan 200 pertsona baino gehiagok hartu dute parte 3 modalitateetan. Haurrak, gazteak eta adineko jende ugari gerturatu ziren igande goizean Aretxabaletako Urkulu urtegira Mundukideri babesa eskaintzera eta Afrikan eta Hego Amerikan burutzen dituzten proiektuekin bat egitera.

X3 lasterketan, 22 taldek hartu dute parte eta bertaratutako gainontzekoak martxa nordiko eta oinezko frogan aritu dira. Hiruko taldeetako lasterketako partaideak honela banatu dira, 10 talde mistoetan, 7 gizonezkoen taldeetan eta 5 emakumezkoetan eta lehia oso estua izan den arren, emakumezkoetan Mondragon Unibertsitateak  irabazi du, mistoetan Arizmendi ikastolak eta Fagor Elektronikak gizonezkoetan. Modalitate bakoitzeko lehenengoek Columbus markako bizikletan ibiltzeko motxila eta Arteaga jatetxeak eta 19,90 gastrotekak eskainitako bazkaria eskuratu dituzte.

Giro ederra AZ Gaubelak-ekin

Urtero bezala, Athlonek eskainitako bi azterketa mediku, 19,90 eta Arteaga jatetxeetako hainbat bazkari eta Columbuseko motxilak zozkatu dira parte hartzaile guztien artean. Eta urtero bezala AZ Gaubela taldeak animatu du goiza, musika bikaina eta esatari lan ezin hobea eskainiaz.

Parte hartzaileen esanetan, “oso giro ona sortu da partehartzaile eta ikusle bezala etorritakoen artean eta ibilbidea oso atsegina da lankide eta familia giroan goiza pasatuaz Mundukiderekin bat egiteko. Urtegiari buelta ematen dion ibilbidea guztiz laua eta zabala da eta inguruko mendi eta zelaiek paisaia ezin hobea eskaintzen dute. 

Eskerrik asko Mundukideren partez Urkulura bertaratutako guztiei eta gaur jasotako elkartasun eta bebesarekin lanean jarraituko dugu herri pobretuetako milaka pertsonen bizi baldintzak hobetzeko aukerak eskaintzen. Datorren urtean ere bertan ikusiko gara, ELKARTASUNA EZIN DELAKO GELDITU!

Sailkapena osotasunean.