Auzitegi Gorenak ere atzera bota du Fagor Etxetresnakeko eta Edesako bazkide talde batek MONDRAGONen aurka jarritako erreklamazioa

Ordaindu eta Eskuratu elkarteetako kideek hasitako prozesua amaitutzat eman du Justiziak. Fagor Etxetresnei (FED) eta Edesari egindako ekarpenen galeragatik MONDRAGON erantzule egiteko auzian ez die arrazoirik eman.
Card image cap
2025/05/05

Auzitegi Gorenak FEDko eta Edesako 372 bazkidek jarritako helegitea ebatzi du, eta bi kooperatiben kaudimen gabeziak eragin zuen ekarpenen galeragatik MONDRAGONi erantzukizunak eskatzeko ezintasuna berretsi du, beste behin. Epai honekin amaitu da ia hamar urte iraun duen prozesu judizial luzea.

Auzitegi Gorenak berretsi egin du MONDRAGONek alegatutakoa, Bergarako Epaitegiak eta Gipuzkoako Probintzia Auzitegiak ere bere garaian egin zuten bezala.

Hasierako eskaria FEDko eta Edesako 957 bazkidek sustatu zuten 2015eko azaroan, eta 47,8 milioi euro eskatu zizkioten MONDRAGONi. Lehenik, Bergarako Epaitegiak eta, ondoren, Gipuzkoako Lurralde Auzitegiak ere, demanda osorik baztertu zuten. Bi erabaki horien ondoren, hasierako 957 demandatzaileetatik 372k bakarrik jarraitu zuten MONDRAGONen aurkako prozesua. Auzitegi Gorenean errekurtsoa jarri zuten, eta 24 milioi euroko erreklamazio-eskaria burutu.

Azken epai honetan, Auzitegi Gorenak ikerketa sakona egin du kasuaren aurrekariei dagokienean –FEDren eta Edesaren konkurtso-prozedurari buruzkoak–, bai eta errekurtsogileek egindako kasazio-arrazoien inguruan ere. Azkenik, Gorenak MONDRAGONek alegatutakoa berretsi du, Bergarako Epaitegiak eta Gipuzkoako Lurralde Auzitegiak egin zuten bezalaxe, errekurtsogileek aurkeztutako argudioen inkoherentzia azpimarratuz.

MONDRAGONen balorazioa

Korporazioak oso modu baikorrean baloratzen du epaia –hirugarrena ildo berean–, MONDRAGONek hasieratik emandako argudioak berresten baititu.