K-Foroa 2026: komunikazioan narratibak duen indarra

Aurtengo edizioan, “Narratibaren garrantzia eta indarra, komunikatzeko eta kontatzeko moduak” izan da abiapuntu nagusia. Jardunaldian zehar, komunikazioaren erronkak eta aukerak aztertu dira, bereziki kooperatibetako praktika errealetatik abiatuta.

Pello Rodriguezek, MONDRAGONeko Kontseilu Orokorreko presidenteak, eman zion jardunaldiari hasiera. Ondoren, Javier Marcos eta Iban Garate Komunikazio departamentuko kideek MONDRAGONeko komunikazio plana aurkeztu zuten.

Kafe-etenaldiaren ostean, eztabaidarako tartea ireki zen “Esperientziak: garena zelan kontatu kanal ezberdinetan” mahainguruaren bidez. Ane Zuazubiskarrek moderatuta, Eduardo Elizalde (Laboral Kutxa), Ainhoa Oyarbide(Eroski), Ander Olariaga (Orbea) eta Asier Ibarrondo (Data Comunicación) aritu ziren hizlari. Parte-hartzaileek, besteak beste, LinkedInen erabilera, marketin estrategiak, adimen artifizialaren aplikazioa eta enpresa-identitatearen eraikuntza izan dituzte hizpide.

Jardunaldiaren bigarren zatian, narratibaren indarrean sakondu zuten Jose Antonio Pérez Ledo gidoilari eta idazleak eta Karmele Jaio idazleak. Biek azpimarratu zuten kontakizunek pertsonengan eta erakundeetan duten eragina, ikuspegi osagarriak eskainiz.

Amaieran, jardunaldiaren ondorio nagusiak bildu ziren, eta parte-hartzaileek mokadutxo baten bueltan solasean jarraitzeko aukera izan zuten, sareak sendotzen eta ideiak partekatzen.

K-Foroak aurtengo edizioan ere agerian utzi du komunikazioa giltzarrietako bat dela erakundeen garapenean, eta kooperatiba orok ezinbestean egokitu beharra dutela komunikazioaren bilakaerara, atzean geratuko ez badira.

Ekitaldiaren argazki-bilduma.