"Gure helburua kalitatezko enplegua sortzea da, ez soilik irabaziak lortzea"

Mondragon Unibertsitateko Enpresagintza Fakultateak, Oñatin, uztailaren 8tik 10era bitartean hartu du International Association for the Economics of Participation (IAFEP) elkartearen XXIII. konferentzia. Nazioarteko topaketa hau parte-hartzearen ekonomiaren, kooperatibismoaren, jabetza partekatuaren eta enpresa demokratikoen inguruko ikerketaren erreferente nagusietako bat da.

MONDRAGON: lehiakortasuna eta gizarte-xedea uztartzen dituen enpresa-eredua

Gaur goizean egindako itxiera jardunaldian Pello Rodríguezek, MONDRAGONeko presidenteak, hartu du parte. Bertan, MONDRAGON Korporazioaren ikuspegi estrategikoa partekatu du bertaratutakoekin, eta lehiakortasuna eta gizarte-xedea oinarri eta ardatz dituen enpresa-eredua aurkeztu du.

"Gure helburua enplegua sortzea da: enplegu ona eta kalitatezkoa. Ez da soilik irabaziak lortzea."

Bere hitzaldian, Rodríguezek azaldu du MONDRAGONen plan estrategikoak modu esplizituan uztartzen dituela enpresa-dimentsioa eta gizarte-dimentsioa, eta kalitatezko enplegua, lehiakortasuna eta komunitateen garapena direla MONDRAGONen hiru ardatz nagusiak. Halaber, azpimarratu du lehiakortasuna ezinbesteko baldintza dela kooperatiba-proiektuaren iraunkortasuna bermatzeko eta enplegua zein ongizatea sortzen jarraitzeko.

"Lehiakortasunik gabe ez dago enpresarik, eta enpresarik gabe ez dago enplegurik."

MONDRAGONeko presidenteak belaunaldi-erreleboa ere nabarmendu du etorkizuneko erronka nagusietako gisa. Gazteak entzuteak, haien ikuspegia proiektu kooperatiboan txertatzeak eta etorkizuneko liderrak prestatzeak duten garrantzia azpimarratu du, MONDRAGONen bereizgarri diren elkartasunaren, konfiantzaren eta nortasunaren balioak zainduz eta etengabe aldatzen ari den enpresa-ingurunearen erronkei erantzunez.

"Gure plan estrategikoak enpresa-dimentsioa eta gizarte-dimentsioa uztartzen ditu."

Hitzaldiaren ondoren, Rodríguezek ordu erdi inguruko galdera-erantzunen saioa egin du hainbat herrialdetatik etorritako ikertzaileekin. Bertan, MONDRAGONen kooperatiba-ereduari, gobernantzari, interkooperazioari, nazioartekotzeari eta etorkizuneko erronkei buruzko galderak erantzun ditu.

Nazioarteko ikerketaren topagunea

Konferentzian 15 herrialdetatik etorritako 90 ikertzaile eta aditu inguruk parte hartu dute; besteak beste, Ameriketako Estatu Batuetatik, Erresuma Batutik, Austriatik, Kroaziatik, Danimarkatik, Frantziatik, Kanadatik, Esloveniatik, Italiatik, Alemaniatik eta Uruguaitik. Hiru egunetan zehar, 55 ponentzia inguru aurkeztu dira saio paraleloetan. Bertan, gobernantza demokratikoa, langileen parte-hartzea, jasangarritasuna, berrikuntza, adimen artifiziala eta kooperatiben eragin ekonomiko eta soziala izan dira jorratutako gai nagusietako batzuk.

Nazioarteko aliantzak sendotu dituen kongresua

Konferentziak nazioarteko eremu akademikoaren eta MONDRAGONen ekosistema kooperatiboaren arteko harremanak indartu ditu, enpresa-eredu parte-hartzaileen inguruko ikerketa, lankidetza eta ezagutzaren transferentziarako aukera berriak sustatuz.

MONDRAGON, nazioarteko komunitate zientifikoarentzako erreferente

Topaketak aukera berri bat eskaini du Mondragon Unibertsitatea eta MONDRAGON Esperientzia Kooperatiboa nazioartean ikusgarri egiteko, mundu mailako ikertzaileen arteko ezagutza-trukea sustatzeko eta ekonomia sozialaren eta parte-hartzailearen inguruko lankidetza zientifikoko sareak indartzeko.

Gainera, aurtengo edizioak duela hogei urte Oñatin egindako IAFEP konferentziaren urteurrena gogora ekarri du, IAFEPen eta Mondragon Unibertsitatearen arteko lotura sendotuz.

Egitarauak, saio zientifikoez gain, hasierako hitzaldi nagusi bat, enpresa parte-hartzaileen etorkizuneko ikerketari buruzko mahai-ingurua eta MONDRAGONeko hainbat kooperatibetara egindako bisitak jaso ditu. Horri esker, parte-hartzaileek nazioarteko komunitate akademikoan interesa pizten jarraitzen duen enpresa-eredua bertatik bertara ezagutzeko aukera izan dute.