Munduak zure begirada behar du

Gaur, otsailak 11, Emakume eta Neska Zientzialarien Nazioarteko Eguna da. Efemeride horrekin bat eginez, MONDRAGONeko kooperatibek mezu bateratu bat zabaldu dute, zientzian eta teknologian emakumeen begirada ezinbestekoa dela aldarrikatzeko.

2026/02/11

Etorkizuneko erronkei aurre egiteko talentu guztia beharrezkoa da. Hori dela eta, MONDRAGONek bere egin du "Munduak zure begirada behar du" goiburua. Mondragon Unibertsitateko hiru ikerlarik azaltzen duten bezala, "emakumeek parte hartzen ez badute, errealitatearen parte bat galtzen dugu".

Bokazioak eta FIRST LEGO League

Aldarrikapenetik haratago, ekintzarako deia ere egiten dute bideoan. MONDRAGONentzat eta unibertsitatearentzat funtsezkoa baita neska gazteak ZTIM (Zientzia, Teknologia, Ingeniaritza eta Matematika) arloetara hurbiltzea.

Ildo horretan, FIRST LEGO League bezalako ekimenak palanka estrategikotzat jotzen dira. Ez da lehiaketa soil bat; neska askok dituzten "oztopo emozionalak" gainditzeko eta teknologiarekiko beldurrak uxatzeko tresna eraginkorra baizik, etorkizuneko profesionalak ahalduntzeko bidea.

FLL Euskadi - MONDRAGON torneoaren antolatzaile dira Mondragon Unibertsitatea eta MONDRAGON, Innobasquerekin batera. Aurtengo edizioan MONDRAGONeko kooperatiba hauen babesa du ekimenak: Ausolan, Batz, Cikautxo, Danobatgroup, Erreka, Fagor Taldea, Ikerlan, Krean, Laboral Kutxa, Lana, LKS Next, Lortek, Maier, Ondoan eta Orbik.