MONDRAGONeko Berrikuntza eta Teknologia Foroa egin da

MONDRAGONeko Berrikuntza eta Teknologia Sailak Berrikuntza eta Teknologia Foroaren edizio berri bat egin du gaur, ekainaren 11n, Arrasateko Garaia Parke Teknologikoko auditorioan. Topaketak MONDRAGONeko kooperatibetako zentro teknologikoetako eta I+G unitateetako 70 profesional baino gehiago bildu ditu, baita arduradun teknologikoak eta ordezkari korporatiboak ere, ezagutza partekatzeko eta industriaren eta zerbitzuen etorkizuna markatuko duten joera nagusiak aztertzeko helburuarekin.

2026ko edizioaren egitaraua

Jardunaldia Ion Etxeberria Ikerlaneko zuzendari nagusiaren ongietorri instituzionalarekin hasi da. Ondoren, Eduardo Beltrán de Nanclares MONDRAGONeko Berrikuntza eta Teknologia arduradunak etorkizuneko erronka teknologiko nagusiak eta MONDRAGONeko I+G+b adierazleak aurkeztu ditu.

Foroaren ardatz nagusietako bat industria eraldatzen ari diren teknologia berriei eskaini zaio. Atal honetan, teknologia kuantikoen egungo egoera eta aplikazio esanguratsuenak aztertu dira, Ane Blázquez Ikerlaneko kideak emandako hitzaldian. Jarraian, Luka Eciolaza Mondragon Unibertsitateko ordezkariak robot humanoideen arloko azken aurrerapenak aurkeztu ditu, haien garapen-egoera, egungo gaitasunak eta ekoizpen- zein zerbitzu-inguruneetan izan ditzaketen aplikazioak aztertuz. Saioan, gainera, hainbat plataforma robotikoren zuzeneko erakustaldiak egin dira.

Kafe-etenaldiaren ondoren, foroak P04-26 Adimen Artifiziala MONDRAGON proiektuaren aurkezpenarekin jarraitu du. Ekimen honen helburua kooperatibetan adimen artifizialeko soluzioen garapena eta ezarpena sustatzea da. Aurkezpena Ion Etxeberriak egin du, eta teknologia horien txertaketa jarduera-esparru desberdinetan bizkortzeko lan-ildoak azaldu ditu.

Ondoren, Alex Etxeberria aDi Data Centerreko zuzendariak datu-zentroen bilakaera, gaur egun eskuragarri dauden zerbitzuak eta kooperatiben digitalizaziorako estrategikoa den azpiegitura horren etorkizuneko hazkunde-aukerak aurkeztu ditu.

Jardunaldia  Vicente Atxa MONDRAGONeko Ezagutza Dibisioko lehendakariordeak amaitu du. Atxak Ezagutza Dibisioaren estrategia eta bilakaera aurkeztu ditu.

Berrikuntza eta Teknologia Foroa MONDRAGONeko berrikuntza-ekosistemarako topagune nagusietako bat bezala sendotu da, esperientzien trukea, lankidetza-aukeren identifikazioa eta MONDRAGONen etorkizuna definituko duten teknologien inguruko hausnarketa partekatua sustatuz.

ARGAZKI GALERIA