Irakurriena
- 1. Elkartasuna nagusi Mundukideren lasterketan
- 2. Jokin Umerez izendatu dute Eneako zuzendari nagusi
- 3. Bazen behin Behobia Donostian
- 4. Pello Rodriguezek "enpresa egiteko beste modu bat" aldarrikatu du BANG à BIG 2026 ekitaldian
- 5. "Elektrifikazioak, kostuen gaineko presioak eta jasangarritasunak berrasmatzera behartzen gaituzte"
- 6. Eskuratu TERNUA produktu sorta
12 kooperatibatako 30 ordezkari inguru MONDRAGONeko Material Aurreratuen eta Fabrikazio Prozesuen Komunitatearen aurrez aurreko lehen saioan
Garaia Parke Teknologikoak MONDRAGONeko Material Aurreratuen eta Fabrikazio Prozesuen Komunitatearen aurtengo hirugarren eta azken saioa hartu du gaur, urriaren 22an. Korporazioko Berrikuntza eta Transferentzia Teknologikoko Departamentuak 2026an jarri zuen abian ekimena. 12 kooperatibatako 30 ordezkari inguruk hartu dute parte aurrez aurreko topaketa honetan. Topaketak aukera eman du ezagutza partekatzeko, gaitasunak identifikatzeko eta arlo estrategiko honetan lankidetzarako aukera berriak aztertzeko.
Komunitatea kooperatibei laguntzeko sortu da, materialen eta fabrikazio-prozesuen arloko erronka teknologikoei aurre egiten laguntzeko. Horretarako, materialak eta fabrikazio-prozesuak aztertzen eta simulatzen, haien ezaugarriak zehazten, probak egiten eta emaitzak baliozkotzen laguntzen du, baita produktu eta material berriak garatzen ere. Horrez gain, besteak beste, material berritzaileak, fabrikazio-prozesu berriak, monitorizazioa eta kontrol adimenduna, eta materialak elkartzeko teknikak lantzen ditu.
Komunitatea kooperatibei laguntzeko sortu da, materialen eta fabrikazio-prozesuen arloko erronka teknologikoei aurre egiten laguntzeko.
Oraingo honetan, Cikatek, Edertek, Eika, Erreka, Galbaian, Ideko, Ikerlan, Leartiker, Lortek, MC3, MGEP eta Orkliko ordezkariak bildu dira saioan. Aurrez aurreko jardunaldi honek urtean zehar aurretik egindako bi saio telematikoei eman die jarraipena.
Ezagutza partekatua eta joera teknologikoak
Egitarauak hitzaldi teknikoak, Korporazioaren gaitasunen aurkezpenak eta ikerketa- eta berrikuntza-proiektuen emaitzak uztartu ditu. Zigor Azpilgainek, MGEPekoak, hitzaldi magistrala eskaini du material aurreratuei eta material funtzionalei buruz.
Bestalde, Kepa Zuluetak, Leartikerren izenean, MONDRAGONek material aurreratuen modelizazioan eta simulazioan dituen gaitasunei buruzko txostena aurkeztu du.
Berrikuntzaren babesak ere izan du bere tokia jardunaldian. Idoia Apraizek, Galbaianekoak, patenteen bidez babestutako joera teknologikoei buruz hitz egin du, material funtzionalen arloan.
Era berean, Mario Cabellok, Ikerlanekoak, aeronautikarako material konposatu autofuntzionalei buruzko Europako proiektuen emaitzak partekatu ditu. María San Sebastianek, Lortekekoak, tenperatura altuko aplikazio aurreratuetarako eta funtzionaltasun bikoitzerako materialen berrikuntzan egindako aurrerapenak aurkeztu ditu. Azkenik, Eber Arregik, Edertekekoak, LPBF (Laser Powder Bed Fusion) teknologiaren bidezko postizen fabrikazioa landu du.
Hirugarren saio honekin, Komunitateak 2026ko jarduera amaitu du, eta MONDRAGONeko kooperatiben eta eragile teknologikoen arteko topagune gisa duen eginkizuna indartu du. Helburua ezagutza partekatzea, gaitasunak bateratzea eta material aurreratuei eta fabrikazio-prozesuei lotutako egungo eta etorkizuneko erronkei aurre egiteko lankidetza sustatzea da.
Albiste erlazionatuak
