MONDRAGON Hospitalityra batu da Orkli

MONDRAGON Hospitalityk, hotelen eta arlo soziosanitarioaren sektorean espezializatutako Korporazioko klusterrak, hazten jarraitzen du. Orkli kooperatibak aliantza estrategiko honetan sartzea ofizialdu du berriki, Ordiziako (Gipuzkoa) egoitza nagusian egindako ekitaldian. Urrats horri esker, klusterrak irtenbide integralak eta teknologikoki aurreratuak eskaintzeko gaitasuna indartu du, gero eta zorrotzagoa den merkatu baten aurrean.

Klima sektorean erreferentea den Orklik proiektuarekin bat egin du bere know-how edo ezagutza guztia eskainiz: zoru erradiatzaile freskagarriak, kontrol-sistema aurreratuak, domotika eta barne-airearen kalitatea (CAI). Integrazio honi esker, MONDRAGON Hospitalityk bezeroei eskaintzen dien balio-katea osatu ahal izango du, eraikuntzatik eta ekipamendutik hasi eta mantentze-lan eta zerbitzuetaraino.

Pisu handiko aliantza estrategikoa

Sinadura-ekitaldian, Ramón Gómez Ugalde MONDRAGON Hospitalityko presidenteak eta Mikel Mujika Orkliko Confort & Salud negozioko zuzendariak bat-egite horren garrantzia nabarmendu zuten.

"Orklitik ilusio eta konpromiso handiz batu gara aliantza honetara", adierazi zuen Mujikak. "MONDRAGON Hospitalityren parte izateak aukera ematen digu gure esperientziatik eratorritako ezagutza partekatzeko, eta, horrela, sektore soziosanitarioan eta hotelekoan eraginkortasun energetikoa, erosotasuna eta osasuna hobetzen laguntzeko".

Bestalde, Ramón Gómez Ugaldek kooperatibaren etorrerak dakarren balio erantsia azpimarratu zuen: "Klimatizazioan, kontrolean eta CAIn erreferente den enpresa bat gehituta, MONDRAGON Hospitalityk eskaintzen duen balio-proposamena osatzen dugu, bereziki arlo soziosanitarioari eta egoitzei dagokienez". Gainera, sinergia horrek taldeko enpresen artean "proposamen eta irtenbide teknologiko berritzaileak" garatzen lagunduko duela gaineratu zuen.

Giharra duen klusterra

Orkliren sarrerarekin, MONDRAGON Hospitalityk dagoeneko hamahiru enpresa biltzen ditu; guztira 15.000 langile inguru eta 750 milioi eurotik gorako fakturazio bateratua dituzte. Klusterra "giltza eskura" erako proiektuen eta zerbitzuen hornitzaile nagusi gisa posizionatzen da hoteletarako zein adinekoen eta ikasleen egoitzetarako.

Hauek dira gaur egun klusterra osatzen duten enpresak: Ausolan, Bexen Cardio, Enea, Erreka, Fagor Electrónica, Gerodan, Kide, Krean, Laboral Kutxa, Ondoan, Onity, Onnera Contract eta, orain, Orkli.