Ikerlan 34 milioi eurora iritsi da 2025ean ikerketa-proiektuetan

MONDRAGON Korporazioko eta Basque Research and Technology Alliance (BRTA) aliantzako kide den Ikerlan zentro teknologikoak 34 milioi euroko fakturazioarekin itxi zuen 2025a. Horrek aurreko ekitaldiarekiko %3ko hazkundea dakar eta azken urteetako goranzko joera sendotzen du. Zenbateko horretatik, 19 milioi euro enpresekin garatutako I+G proiektuei dagozkie, eta beste 13 milioi euro programa publikoetako ikerketa-jardueretatik etorri dira.

Enpresei egindako transferentzia, jarduera hazkundearen eragile nagusietako bat izaten jarraitzen du, zentroaren diru-sarrera guztien %59 ordezkatuz eta enpresentzako erreferentziazko bazkide teknologiko gisa duen posizionamendua indartuz. Gainera, enpresekin lortutako diru-sarreren %80 euskal enpresetatik etorri dira, zentroak bere ingurunearekiko duen konpromiso sendoaren erakusgarri. Aldi berean, ikerketa-jarduera egonkor mantendu da Europako programetan lehia handia izan arren, Eusko Jaurlaritzaren Elkartek eta Emaitek Plus programetan parte hartzeari esker.

“2025 urte positiboa izan da Ikerlanentzat, eta egindako ahaleginari esker, gure hazkundea sendotu eta enpresei balioa transferitzeko orientazioa indartu dugu. Lortutako emaitzek gure ereduaren sendotasuna eta gero eta lehiakorragoa den ingurune batera egokitzeko dugun gaitasuna erakusten dute. Gaur egun, Ikerlan proiektu teknologiko eta kooperatibo sendoagoa, garrantzitsuagoa eta ingurunean eragin positibo handiagoa duena da”, adierazi du Ion Etxeberria Ikerlaneko zuzendari nagusiak gaur Arrasaten egindako Ohiko Batzar Nagusian.

Era berean, Ikerlanek 1,8 milioi euroko inbertsioak egin ditu funtsezko azpiegitura teknologikoak indartzeko, hala nola PCB eta energia-biltegiratze laborategiak, etorkizuneko lehiakortasuna bermatzeko giltzarri direnak.

2025 urte positiboa izan da Ikerlanentzat, eta egindako ahaleginari esker, gure hazkundea sendotu eta enpresei balioa transferitzeko orientazioa indartu dugu. Lortutako emaitzek gure ereduaren sendotasuna eta gero eta lehiakorragoa den ingurune batera egokitzeko dugun gaitasuna erakusten dute.

Startupen ekosistemari bultzada

Startupen ekosistema bultzatzea izan da ekitaldiko mugarri nagusietako bat. Honen eredu dira Orbik Cybersecurity kooperatiba bihurtu izana eta MONDRAGONekin sinatutako akordioa; azken honi esker, datozen lau urteetan 10 milioi euro baino gehiago mobilizatuko dituzte Euskadin enpresa-ekimen berriak sortzeko.

MONDRAGONekin lankidetza-esparru horren baitan, 2025ean bi enpresa-proiektu berri jarri dira abian. Alde batetik, Innkia, adimen artifizialeko soluzioetan espezializatua eta Laboral Kutxarekin batera sortua; bestetik, Amets, sare elektrikoetarako potentzia-elektronikako soluzio aurreratuak garatzera bideratua, Arteche Taldearekin lankidetzan. Ekimen horiek teknologia-arloan jarduera ekonomikoa eta enplegua sortzeko apustu irmoa erakusten dute, eta Ikerlanek ingurunean trakzio- eta ekintzailetza teknologikoko eragile gisa duen rola indartzen dute.

Adimen Artifiziala ardatz estrategiko gisa

2025ean zehar, Ikerlanek IK2029 marko estrategiko berria definitu du, MONDRAGONen proiektu sozioenpresarialaren eta Euskadiko Industria Planaren lehentasunekin lerrokatuta. Plan horrek adimen artifiziala eraldaketarako ardatz nagusi gisa kokatzen du, ez soilik palanka teknologiko moduan, baizik eta Ikerlanek inguruko enpresek teknologia hori bereganatzeko prozesuan erreferentziazko eragile bihurtu nahi duen eremu gisa ere, haien lehiakortasunean eta industria zein enpresa erronka berrietara egokitzean modu erabakigarrian lagunduz.

Testuinguru horretan, zentroko presidente Adolfo Plazak azpimarratu du batzarrean “Ikerlanek rol estrategikoa betetzen duela enpresen lehiakortasunean, bereziki gaur egungo azelerazio teknologikoaren testuinguruan. 2025ean lortutako aurrerapenek, bereziki startupen sustapenean eta etorkizuneko estrategiaren definizioan egindakoek, datozen urteetan inpaktu ekonomiko eta soziala sortzen jarraitzeko oinarriak ezartzen dituzte. Aurrerapauso sendoak ematen eta erabaki estrategiko giltzarriak hartzen jarraitu behar dugu gure bokazio teknologikoaren, konpromiso kooperatiboaren eta ingurunearekiko sustraitzearen alde”.

Ikerlanek rol estrategikoa betetzen du enpresen lehiakortasunean, bereziki gaur egungo azelerazio teknologikoaren testuinguruan.

Presentzia handiagoa Bizkaian, talentua eta ikerketa

IKERLANek Bizkaian duen presentzia indartzen jarraitzen du, eta 2025ean bi urrats bereziki garrantzitsu eman ditu. Batetik, Bilboko instalazioak handitu ditu, lurraldean duen gaitasun operatiboa sendotuz. Bestetik, Bilbao Bizkaia Digital Hub proiektua aurkeztu du; 20 milioi eurotik gorako inbertsioa izango duen ekimen hori Zorrotzaurreko Teknologia Parkean kokatuko da eta, Mondragon Unibertsitatearen eta Ikerlanen arteko lankidetzari eta MONDRAGONen babesari esker, talentuaren garapena eta teknologia digitalen aurrerapena sustatuko ditu, herrialdearen eraldaketarako motor gisa.

Antolakuntza-mailan, plantillak egonkor jarraitu du, 15 bazkide berri gehituta. Gaur egun, 400 profesional espezializatutik gorako taldea du Ikerlanek. 2025ean, zentroak Eusko Jaurlaritzak emandako urrezko Bikain ziurtagiria eskuratu zuen, euskararen erabilera eta kudeaketan mailarik gorena aitortzen duena eta bere jardueran integratutako hizkuntza-estrategiarekiko konpromisoa indartzen duena.

Arlo zientifikoan, Ikerlanek ikerketa-jarduera bizia mantendu zuen 2025ean: 57 doktore-tesi garatzen ari ziren, 7 amaitu ziren eta 10 berri abiatu ziren. Zentroak unibertsitate-sarearekin lankidetza estua sustatzen jarraitzen du, eta harreman estrategikoak ditu Mondragon Unibertsitatea, EHU eta Barcelona Supercomputing Center bezalako erakundeekin, besteak beste.