Fagor Healthcarek farmazietako asistentzia-lana eraldatu du, monitorizazio eta eraginkortasun soluzio berriekin

Fagor Healthcarek, tratamenduarekiko atxikimenduan erreferente den MONDRAGON Healtheko kooperatibak, farmazia komunitarioaren papera indartu du, bi aurrerapen tekniko aurkeztu ondoren. Batetik, FMD softwarea berritu du (Bilakaera Asistentziala) eta, bestetik, dosifikazio-sistemen prestaketan karga paraleloko sistema ezarri du. Hala, erakundeak sektore soziosanitarioko lidergoa sendotu du, gaixoaren segurtasuna eta profesionalen errentagarritasuna hobetzera bideratutako teknologiaren bidez.

FMD programa blisterrak prestatzeko tresna soil bat izatetik harago doa: jarraipen kliniko integralerako tresna da orain

FMD programa blisterrak prestatzeko tresna soil bat izatetik harago doa: jarraipen kliniko integralerako tresna da orain. Funtzio berri honi esker, farmazialariek tratamenduaren atxikimendua erregistratu eta ebaluatu dezakete, Morisky-Green testaren bidezko estandar zientifikoak erabiliz. Gainera, botikekin lotutako arazoak (BLA) identifikatzeko eta gaixoen bilakaera analitikoa denboran zehar ikusteko aukera ematen du. Ikuspegi zentralizatu horrek erabaki klinikoak hartzea errazten du, eta farmazia osasun-agente aktibo bihurtzen du, asistentzia-txosten osoak sortzeko gaitasuna emanez.

Karga paralelora jauzia

Industria eta eraginkortasun mailan, Fagor Healthcarek prestaketa sekuentzialaren muga apurtu du karga paraleloa merkaturatuta. Orain arte, blisterrak banan-banan prozesatzen ziren; berrikuntza honi esker, sistemak lau unitate aldi berean prestatzeko aukera ematen du gaixo berarentzat, bi eta lau aste arteko epeak paraleloan landuz.

Hobekuntza hau eskuzko nahiz automatizatutako lan-prozesuetan aplika daiteke, hainbat makina koordinatuta erabiliz. Horrek prestaketa-denborak nabarmen murriztea nahiz osasun-langileentzat lan-fluxu askoz arinagoa lortzea dakar. Horrela, teknologiak dosifikazioaren zehaztasuna bermatzeaz gain, farmaziako baliabideak optimizatzen ditu, software konbentzionalaren sinpletasuna aldatu gabe.

Gailu bat hiru orduan behin

Garapen teknologiko honek bat egin du kooperatibaren hazkunde-garaiarekin. Infarma azokak emandako bultzadaren ondoren, Fagor Healthcarek gailurra jo du apirilean salmenta-bolumenean, instalazioetan eta sektorean lortutako oihartzunean.

“Inoiz ikusi gabeko hazkunde-erritmoa daramagu. Infarma bultzada handia izan ohi da guretzat, baina aurten benetako jauzia eman dugu: egunero instalazioak egiten ari gara, eta, batez beste, hiru lan-orduan behin Medical Dispenser gailu bat saltzen dugu“, azaldu du Beatriz Leciñanak, Fagor Healthcareko zuzendari nagusiak. “Emaitza horiek, azken izendapen eta ekitaldiekin batera, SPD dosifikazio-sistema erdiautomatikoen merkatuan lider gisa finkatzen gaituzte”.

Fagor Healthcareko zerbitzu osoaren erabiltzaileen artean tratamenduarekiko atxikimendua %95ekoa da. Duela gutxi Fagor Taldean sartu den kooperatiba honek MONDRAGON Healtheko ezinbesteko bazkide gisa sendotu du bere burua, farmazia balio handiko asistentzia-eremu bihurtzeko bidean.