EUSPOT lehiaketako sari nagusia “Klik bat baino gehiago” spotak irabazi du

Zergatik sortu euskarazko edukia sare sozialetan" izenpean euskarazko Euspot lehiaketako hamabostgarren edizioaren helburua izan da gazteak euskarazko publizitatera gerturatzea eta gazteen sormena sustatzea. Zaraia aretoa jendez bete zen irabazleen izenak zeintzuk ziren jakiteko eta lanak txalotzeko. Arizmendi Ikastola eta Mondragon Unibertsitatea dira, Aretxabaletako Udalarekin eta Arteman Komunikazioarekin batera, lehiaketaren antolatzaileak. Eusko Jaurlaritzako Kultura eta Hizkuntza Politika Sailaren babesa du ekimenak eta laguntzaileen artean daude Bai Euskarari Elkartea eta Music Library.

Ekitaldiaren argazki albuma: https://www.flickr.com/photos/arteman/albums/72177720334143102/

Irabazleak

Guztira, Euspot-ek 3.000 eurotik gora banatu ditu saritan, sei kategoria ezberdinetan:

Spotik onena / 1.000 euro

"Klik bat baino gehiago" spota

Egileak: Asier Corchete eta Anje Arlanzon (Oñati eta Arrasate)

Spotaren kalitate teknikoa eta mezuaren egokitasuna da gehien baloratu dena.

Aitziber Atorrasagasti, Eusko Jaurlaritzako Hizkuntza Politikarako zuzendariak banatu du saria.

Mondragon Unibertsitateko ikasleen spotik onena / 500 euro

“Izan marrazo!” spota

Egileak: Eneko Eizagirre, Auritz Loidi eta Eider Abarrategi (Zarautz, Bergara eta Arrasate)

Nagore Ipiña, Mondragon Unibertsitateko Humanitate eta Hezkuntza Zientzien Fakultateko dekanoak banatu du saria.

Publikoaren saria / 500 euro

1.800 bozkatik gora jaso dira sarean guztira.

“Zergatik ez?” spota

Egileak: Eñaut, Manex, Jokin, Oier, Ane, Intza, Noa, June, Haizea, Lea, Maialen, June, Izar, Nora, Jare, Maialen, Naia, Laia, Iraun, Alain eta Aiza (Ondarroa)

Garikoitz Iturbe, Aretxabaletako alkateak banatu du saria.

Musika sinkronizazio onenaren saria / 300 euro

Iragarkiaren musika egokitasunagatik eta originaltasunagatik.

“Igo ezazu bideoa” spota  

Egileak: Mikel Lizardi eta Inhar Ormazabal (Elizondo eta Iruñea)

Arantzazu Lagunilla, Artemaneko zuzendariak banatu du saria.

Gazteen saria (18 urtetik beherakoak) / 500 euro

“Eman like euskarari!” spota

Egileak: Sara Iraola Arriaran eta Naia Martinez Oruna (Arrasate)

Naiara Okina, Arizmendi ikastolako komunikazio arduradunak banatu du saria.

Arizmendiko ikasleen spotik onena / 250 euro

“Sarea zurea da!” spota  

Egileak: Lander Valle eta Peru Iturricastillo (Aretxabaleta)

Naiara Okina, Arizmendi ikastolako komunikazio arduradunak banatu du saria.

Parte-hartze handia: Euskal Herri osotik jasotako 95 spot

Euspot Euskal Herrian aitzindaria da euskara, sormena eta publizitatearen arloa uztartzen eta erreferente bilakatu da euskarazko publizitatearen harrobia lantzen. Ondo errotutako lehiaketa da eta orain arteko edizio guztiak batuta 1.000 spot baino gehiago jaso dira. 2026ko edizioan Euspoten parte-hartzea handia izan da: guztira 95 lan aurkeztu dira. Aurkeztutako lanen artean, 14 lan 18 urtetik gorakoek eginak dira, eta 81 spot adin txikikoek eginak.

Spot guztiak ikusgai: https://euspot.eus/hemen-dituzue-95-spotak-ikusgai-2/

Aurten ere Euskal Herriko leku askotan landu dituzte spotak: Elizondo, Iruña, Bilbo, Donostia, Gasteiz, Aretxabaleta, Zarautz, Santurtzi, Ondarroa, Bergara, Arrasate, Azkoitia, Oñati, Anztuola, Villabona, Legazpi, Oiartzun, Eskoriatza...

Eskerrik asko guztiei!

Aurtengo gaia: “Zergatik sortu euskarazko edukiak sare sozialetan?”

Helburua izan da  30 segundoko iragarki bat sortzea, gazteak sare sozialetan euskarazko edukiak sortu eta kontsumitzera bultzatzeko.

Mundu digitala euskaraz margotzea ekintza sortzaile eta boteretsua da. Euskara da gure bereizgarri nagusia mundu globalizatu honetan, eta edukiak euskaraz igotzean, identitate digital propioa eraikitzen dugu. Ez gara kopia bat; begirada berezia eskaintzen diogu munduari. 

Erdarazko ozeanoan, euskara da gure balio erantsia. Algoritmo guztien gainetik errazagoa da erreferente izatea euskal komunitatean, milioika lagunekin gaztelaniaz, frantsesez edo ingelesez lehiatzea baino. Euskarazko sorkuntza kalitate handikoa da, eta indartzen ari da eduki-sortzaile berrien olatuari esker. Ondorioz, euskarazko edukiaren bolumena hazten ari da, eta gertuko edukiak kontsumitzeko joera handitzen doa.

Ikasleak sormenari buruzko formazio saioetan

Aurten ere antolakuntzak ikus-entzunezko publizitatearen gaineko formazioak eskaini ditu Euskal Herriko ikastetxeetan, spot egileen harrobia indartzeko asmotan. Formazio saioen helburua izan da gazteei sormenaren eta publizitatearen inguruan izan dezaketen sena sustatzea eta lehiaketan parte hartzera animatzea. Azken urteetan 6.000 ikasle baino gehiagok jaso dituzte Euspoteko formazio saioak hezkuntza zentro ezberdinetan.

Babesle nagusia Eusko Jaurlaritzako Kultura eta Hizkuntza Politika Saila

2026ko edizio honetan Eusko Jaurlaritzako Kultura eta Hizkuntza Politika Saila izango da babesle nagusia.

Honako hauek dira babesle eta antolatzaileak:

Babeslea:

• Eusko Jaurlaritzako Kultura eta Hizkuntza Politika Saila

Antolatzaileak:

• Aretxabaletako Udala
• Arteman Komunikazioa
• Mondragon Unibertsitatea
• Arizmendi Ikastola

Laguntzaileak:

• Bai euskarari Elkartea
• Music Library