TUlankide MONDRAGON

"Epe laburrean 1.000.000 amantal inguru emango ditugu osasun-zentroetarako"

2020/04/27

Beatriz Leciñana, Fagor Healthcare-ko Sales&Marketing zuzendariak azaltzen du nola egokitu diren koronabirusak sortutako egoera berrira.
"Epe laburrean 1.000.000 amantal inguru emango ditugu osasun-zentroetarako"

- Nola eragin dio koronabirusaren krisiak Fagor Healthcareri? Zer aldaketa izan dira produkzioan, lan-ohituretan, pertsonalean...?

Salbuespen egoerarekin jarraitzen dugu, langileak bulegoan fisikoki ahalik eta gutxien azalduz, eta, neurri handi batean, telelana egiten jarraitzen dugu. Hasieratik, urruneko funtzionamendu-sistemak ezarri ziren, behar bezala, normalean ematen ziren zerbitzu guztiak eten gabe. Fagor Healthcare kooperatiba txiki honen xedea da pertsonen osasuna eta bizi-kalitatea hobetzea, farmazietarako eta beste zentro soziosanitario batzuetarako soluzio teknologikoen bidez.

Uneoro argi izan genuen helburu nagusia gure bezeroei ohiko zerbitzua emateari ez uztea zela, eta errutina batzuk berregokitu egin behar izan genituen, gure bezero guztiak egoera ezin hobean artatu ahal izateko, sektore guztientzat oro har, baina are gehiago lehen lerroan ahaleginak biderkatu behar izan dituen sektore farmazeutikoarentzat.

Lan txandak egokitu egin ziren, departamentu bereko pertsonak bat ez etortzeko eta, ahal zen neurrian, telelana sustatu zen.

- Produktu berriak egiten hasi zarete, ezta? Nolakoa izan da prozesua?

Osasun krisi honen hasieran, Fagor Healthcarek pandemiaren aurkako borrokan aletxetxo bat jar zezakeela ikusi zuen. Fagor Healthcare-n, krisi honetan balio erantsia izan zezakeen material bat, PET, asko ezagutzen da. Medikazioa dosifikatzeko egiten diren blisterrak material horrekin egiten dira, eta gure kolaboratzaileen bidez, PETen egindako aurpegiko pantailak ematen hasteko aukera aztertu zen.

Hasieran, babes-ekipo guztien harrera, beharra eta eskaerak hain handiak izan ziren, ezen NBE gehigarriak sartu genituen, erakunde publikoen zein pribatuen eskaeren ondorioz.

Beti farmaziekin harremanetan, uste dugu premia horiei nola erantzun behar genien ikusi behar genuela, osasunarekin lotutako enpresa baikara.

-Izan ere, 1.000.000 amantal inguru egiteko kontratu garrantzitsua lortu duzue.

Hala da. Hainbat esparrutatik azaldu ziguten behar handienetako bat amantalak zirela, eta berehala hasi ginen horretan, eskaerari erantzun ahal izateko. Lan horren guztiaren ondorioz, 1.000.000 bat amantal emango ditugu epe laburrean.

Erantzunaren berehalakotasuna funtsezkoa izan da prozesu honetan, eta  buru-belarri inplikatuta dagoen taldeari esker eman ahal izan dugu erantzun azkarra.

Amantal gehienak osasun-zentroetarako erabiliko dira, baina era askotako eskaerak iristen zaizkigu saltoki txikietatik, hala nola mertzerietatik, fisioterapia-kliniketatik edo fruta-dendetatik. Gure ahalmenen arabera eskatzen diguten guztiari erantzuten saiatzen gara, ahal den guztietan lagundu behar dugula uste baitugu.

Enpresa guztietan ezinbestekoa da langile guztien laguntza, baina are gehiago taldea txikiagoa denean eta egoera horrek gu guztion indarrak hartzen dituenean aurrera egiteko. Uste dut hori dela pandemia horretatik daramagun ikasgai nagusietako bat, elkartasuna ezinbestekoa dela, eta Fagor Healthcaren sailen arteko lankidetzak zeregin erabakigarria izan du, oso ondo ulertu baitira berehalako beharrak.

- Etorkizunari begira, produktu-dibertsifikazioaren ildotik jarraituko duzue, ala gaur egungo egoerak sortutako zerbait da?

Egoerak eraginda, gure enpresa eta negozioa berriro asmatu behar izan dugu eta prozesu honetan ezinbesteko papera izan du Enrique Gómez, Eragiketetako zuzendariak. Lehen esan dudan bezala, talde-lana izan da asmakuntza posible egin duena; izan ere, taldean iristea lortzen da, baina logistikarik gabe, ekoizpenik gabe, administraziorik gabe... hori guztia ezinezkoa litzateke.

Epe ertainera, pixkanaka ikusi beharko dugu ea egoera puntual hori gelditzeko etorri den, baina, etorkizunari begira, gure negozioan zentratuta egotea gustatuko litzaiguke, hau da, farmaziei beren pazienteen medikazio-blisterra prestatzen laguntzen dien gailua egitea.

Sendagaiak Dosifikatzeko Zerbitzu Pertsonalizatuaren merkatuan erreferente izan nahi dugu, baina uste dugu mundua aldatzen ari dela, eta, ziur aski, krisi horren ondorioz farmazietako protokoloak ere aldatu egingo direla. Horregatik, eskatzen zaizkigun eskakizun guztiak betetzeko adi egoten saiatuko gara, osasunarekin oso kontzientziatuta baikaude, eta are gehiago osasun-krisi batek mundua hankaz gora jartzen duen garai honetan.

Eguraldia
Asteartea 20 Min: 15
Max: 20
Asteazkena 21 Min: 14
Max: 22
Osteguna 22 Min: 12
Max: 21
Bideoak


+ Bideo gehiago

Papereko edizioa
Jarraitu twitterren
LagunAro

Iradokizunak

iradokizunak