Basabeazpi Guneak (Arizmendi Ikastola) 20 urteko ibilbidea ospatuko du gaur Aretxabaletan

Irakaskuntza

Arratsaldeko bostetatik gauera arte festa nagusituko da gaur Basabeazpi Gunean, Aretxabaletan. Arizmendi Ikastolak 20 urteko bidea ospatuko du ikastolaren kolektibo zabalarekin. Ikasle eta irakasleak, ikasle ohiak, irakasle ohiak, lagunak, senideak eta festara batu nahi duten guztiekin.

2025/10/24

Arizmendiko Basabeazpi guneak 20 urte bete ditu dagoeneko. Urteetan Aretxabaletako ehunka umek egin dituzte Ikastolako ibilbideko lehenengo urratsak bertan. Baita urrats irmoekin hasi ere, goizetan atetik sartu eta berehala, Basabeazpin aurkitzen duten eta urteetan izan duten konfiantza, zaintza eta errespetuzko giroari esker. Zenbat maitasun, bizipen eta esperientzia bildu dituzten ikastolako gazteenek, baita bertako giro magikoa Atxabaltako herrira barreiatu ere!

Ikastolako lagunak, ikasle-ohiak, familiak… Aretxabaletako herritar guztiak daude gonbidatuta bertara

Orain, bertako profesionalek egindako lana eskertzeko eta festa giroan urteurrena ospatzeko momentua da. Horretarako, festa dotorea antolatu dute Ikastolako irakasle, familia eta ikasleok. Arratsaldeko 17:00etatik aurrera elkartzeko deialdia egin da. Ekitaldi ofizial labur batekin emango zaio hasiera arratsaldeari, eta gero, gunea bisitatu ahal izango da txikitako oroitzapenei lekua egiteko; jolas eta tailerrak egongo dira gazteenendako, eta musika eta jan-edanekin bukatuko da ospakizuna.

Ikastolako lagunak, ikasle-ohiak, familiak… Aretxabaletako herritar guztiak daude gonbidatuta bertara.