“Sektore soziosanitarioko barne-diseinuak erabiltzaileen eta profesionalen bizi-kalitatea eta ongizatea hobetzen ditu”

Madrilen batu da sektore soziosanitarioa otsailean, erronka bati erantzuteko: “Zentzuz zaintzea”. Eraldaketa-testuinguru honetan, Santi Pérez Caballerorekin hitz egin dugu, zeinak ilusioz hartu duen Gerodaneko zuzendaritza nagusia. MONDRAGON Health-eko kide den kooperatiban zazpi urteko ibilbidea egin ondoren, Pérez Caballerok azaldu du nola diren diseinua eta barne-diseinua oinarrizko zutabeak arreta humanizatzeko eta mendekotasuna duten pertsonen zein zaintzaileen bizitza hobetzeko.

Gerodaneko zuzendari nagusi kargua hartu berri duzu. Nola egiten diozu aurre etapa berri honi? 

Ilusio eta ardura handiz. Duela zazpi urte iritsi nintzen Gerodanera, eta oso kontziente naiz kooperatiba honetan egindako lanaz. Oinarri sendoak ditugula uste dut, osasuntsu dauden merkatuetan lan egiten dugu, eta oso harro nago etorkizunean talde hau gidatzeaz.

Guztiaren erdigunean erabiltzailearen eta zaintzailearen zaintza dago; horregatik, profesional horiekin lan egiten dugu proiektu guztietan, hasieratik

Mendekotasun eta Osasun Biltzar Nazionala bezalako foro esanguratsuan, zein izan da Gerodanek transmititu nahi duen ideia nagusia?

Oso mezu sendoa lantzen gabiltza duela urte batzuetatik: diseinua eta barne-diseinua balio erantsi gisa txertatzea gure eskaintzan. Barne-diseinua zentzurik zabalenean ulertzen dugu: espazioei, giroei, sentsazioei, materialei eta produktuaren prestazioei aplikatuta, eta betiere erabiltzailearen eta hura zaintzen duen profesionalaren zerbitzura.

Biltzarraren leloa “Zentzuz zaintzea” izan da. Nola eramaten dute errealitatera kontzeptu horri zuen diseinu eta ekipamenduek?

Gure produktuak espazioa osatzen duten gainerako elementuekin egokituz eta konbinatuz ematen diogu forma kontzeptu horri. Helburua ingurune atsegin, eroso eta etxekoia sortzea da, erabiltzaileari ongizatea eta segurtasuna transmititzeko eta, aldi berean, profesionalaren lana errazteko.

Noraino hobetu dezake barne-diseinu on batek mendekotausna duen pertsona baten ongizatea?

Barne-diseinuak, bere zentzurik zabalenean, erabiltzailearen eta profesionalaren bizi-kalitatea eta ongizatea hobetzen ditu. Ongi koordinatutako koloreek transmititzen dituzten sentsazioek, altzarien kokapenak, espazioen banaketak, zarata murrizten duten materialek eta mugikortasun-prestazioak dituzten altzari egokituek erosotasuna, ongizatea, lasaitasuna eta segurtasuna sortzen dituzte. Hain zuzen ere, horren adibide den kasu arrakastatsu bat azalduko dugu Biltzarrean. 

Sarritan, ekipamendua zerbait estatiko gisa ikusten da, baina Gerodanek ergoterapeuta, arkitekto eta diseinatzaileekin elkarlanean jarduten du. Nola laguntzen du ikuspegi horrek zaintza aktiboa sustatuko duten espazioak sortzen?

Guztiaren erdigunean erabiltzailearen eta zaintzailearen zaintza dago; horregatik, profesional horiekin lan egiten dugu proiektu guztietan, hasieratik. Erabiltzailea, profesionalak, teknikariak eta senideak entzun behar ditugu eta gure taldeekin lan egin, eraikin eta espazio bakoitzaren arabera ingurune optimoa diseinatzeko, bertan bizi diren eta harremanetan jartzen diren profil guztientzat elkarbizitza-leku egokia lortzeko.

Ezagutza handiagoa, indarra, presentzia eta sinergia komertzialak ematen dizkigu MONDRAGON Health-ek

Sektorea pertsonan zentratutako arretarantz doa. Nola ari da prestatzen Gerodan zaintza-ingurune gizatiarragoen eskari horri erantzuteko?

Gerodanen gertutik jarraitzen ditugu merkatuaren mugimenduak. Adibidez, zaintza behar duten pertsonak beren etxeetan, senideengandik gertu eta beren ingurunean gera daitezen sustatzen duten ekimen nazionaletan parte hartzen dugu. Horrek guztiak etxebizitzak, espazioak, altzariak eta materialak egokitzeko azterketak eskatzen ditu, baita etxean bertan zaintzak errazten dituzten aplikazio berritzaileak txertatzea ere.

Gerodan MONDRAGON Health-eko kide da. Zer balio bereizgarri ematen dio bezeroari aliantza integral baten babesa izateak?

Hala da, MONDRAGON Hospitality-ren kasuan bezala, kooperatiba arteko aliantza honetako kide gara. Izan ere, batzen garenean gure indarra biderkatzen dugu, eta elkarrekin urrunago iristen gara. Ezagutza handiagoa, indarra, presentzia eta sinergia komertzialak ematen dizkigu. Lankidetzan eta eskuzabaltasunean oinarritutako aliantza hauek ikuspegi zabalagoarekin pentsatzeko aukera ematen digute, eta bakarrik bide luzeagoa eta konplexuagoa izango luketen ateak irekitzen dizkigute.

Nola laburbilduko zenuke esaldi bakar batean Gerodanek sortutako ingurune batean bizitzearen esperientzia?

Duela gutxi Bilbon eta Iruñean entregatu berri ditugun bi egoitza bisitatu ditut. Izan nuen lehen sentsazioa ongizatea, bakea, argitasuna eta segurtasuna izan zen. Bi hiri horietako zurrunbiloaren erdian dagoen lasaitasun-oasien antzekoak dira.