"Irailetik aurrera estatuaren iparraldeko eremu osoari emango diogu zerbitzua, Elgoibarren bulego berria irekita"

Ferran Martínez Sentineleko CEOak proiektuaren sorrera, Mondragon Assemblyn izan duen integrazioa, konpainiaren sendotzea Espainian eta Portugalen, eta automatizazio industrialeko soluzio aurreratuetan erreferente bihurtzeko etorkizuneko erronkak jorratzen ditu.

Nola sortu zen Sentinel proiektua, eta zein arlotan egiten du lan?

Sentinel proiektua Mondragon Assemblyren barruan sortu zen, ikusmen artifiziala datozen urteetan automatizazio industrialaren funtsezko elementua izango dela sinetsita, eta teknologia horren ezagutzak MONDRAGONEN barruan sinergia handiak sor ditzakeela ikusita. Kooperatibaren 2021-2024 Plan Estrategikoaren barruan, argi zehaztuta zegoen jarduerarekin lotura estua zuten teknologia edo sektore berrietara dibertsifikatzeko beharra, eta Sentinel izan zen lehenengo apustuetako bat.

Sentinelek giltza eskuan ikusmen artifizialeko eta adimen artifizialeko irtenbideak eskaintzen ditu industria-ingurunean. Horretarako, hainbat hardware marka integratzen ditu software propioarekin, bai ikusmen artifizial konbentzionalerako (Vision Core), bai adimen artifizialean oinarritutako irtenbideetarako (Kaimaker). Horrez gain, eremuan pilatutako esperientzia zabalari esker, hardwarean, softwarean, optikan eta argiztapenean ezagutza espezializatua eskatzen duten ikusmen-proiektu konplexuetan eragile garrantzitsua da.

Azken batean, beharrezko ezagutza-arlo guztiak modu egokienean uztartzen ditugu, gure bezeroei emaitza sendo eta fidagarriak bermatzeko.

Noiz gurutzatu ziren Sentinelen eta Mondragon Assemblyren bideak, eta nola baloratzen duzue lankidetza hori?

Proiektua 2024an abiatu zen, Espainiako eta Portugalgo ikusmen artifizialeko eragileen merkatu-azterketa batekin. Azterketa hori Saiolanen eta MONDRAGON Sustapen Zentroko Bideragarritasun Azterketarako tresnaren laguntzarekin egin zen. Testuinguru horretan ezagutu genuen Sentinel, hasiera batean Guimarãesen (Portugal) sortutako enpresa.

Lehen elkarrizketen ondoren, ikusi genuen Mondragon Assemblyk negozio honentzat zuen ikuspegiaren eta Sentinelek bere ibilbide laburrean (lau urte besterik ez zituen orduan) garatutako estrategiaren artean bat-etortze handia zegoela.

Horren adibide dira software plataforma propioa izatea, proiektu mota hauek eskatzen duten pertsonalizazio-gaitasunarekin; hardwarearekiko independenteak izatea, bezero bakoitzaren beharretara ondoen egokitzen diren osagaiak aukeratzeko aukera emanez; edo hasieratik sektore jakinetarako ikusmen-produktu espezializatuak garatzearen aldeko apustua egin izana.

Horrez gain, enpresa eta negozioa ulertzeko moduan sortzaile bazkideen (Joel Alves eta Álvaro Oliveira) eta Mondragon Assemblyko taldearen artean zegoen sintonia handiak, eta bazkideek epe luzerako bidea industria-bazkide sendo batekin egiteko erakutsi zuten borondateak ahalbidetu zuten Guimarãeseko enpresa erosteko akordioa eta iazko urte hasieran Sentinel España sozietate mistoa (JV) sortzea.

Bidea hasi besterik ez bada ere, azken urte eta erdian Sentinel España sendotzeko oinarriak ezarri ditugu eta Portugalgo taldea indartu dugu, epe laburrean Sentinel Iberiar penintsulako ikusmen artifizialaren erreferente bihurtzeko.

Bidea hasi besterik ez bada ere, azken urte eta erdian Sentinel España sendotzeko oinarriak ezarri ditugu eta Portugalgo taldea indartu dugu, epe laburrean Sentinel Iberiar penintsulako ikusmen artifizialaren erreferente bihurtzeko.

Nolakoa izan da Sentinelen bilakaera ordutik?

Azken bi urteetako egoera makroekonomikoa eta ekipamendu-ondasunen inbertsiorako aurreikuspenak onenak izan ez diren arren, Sentinel indartsu abiatu da. Rubín (Bartzelona) hutsetik sortutako taldeak gaur egun zazpi kide ditu, eta enpresa eratu eta bederatzi hilabete baino lehen lehen eskaerak lortu ditu.

Aldi berean, Portugalen dugun presentzia eta taldea ere sendotu ditugu. Gaur egun 20 laguneko lantaldea eta ikusmen artifizialeko softwarea garatzeko zentro bat ditugu bertan.

Lan handia egin dugu, batez ere Sentinel marka nazio mailan ezagutarazteko. Portugalen ezaguna zen arren, Espainiako merkatuan hutsetik hasi behar izan dugu.

Aipatu nahiko zenuketen azken lorpen edo mugarri garrantzitsuren bat?

Iberiar penintsulan sendotzeko estrategiaren barruan, irailean bulego berria zabalduko dugu Euskadin, Elgoibarren.

Irekiera honekin, Sentinelek hiru kokapen estrategiko izango ditu penintsulan:

1. Guimarães: Portugal eta Galiziako bezeroei zerbitzua emateko.
2. Rubí: Katalunia, Levante eta Aragoiko merkatuak estaltzeko.
3. Elgoibar: Euskadi, Nafarroa, Errioxa, Kantabria eta iparraldeko gainerako lurraldeei zerbitzua emateko.

Elgoibarko bulego berria Jon Mataren gidaritzapean egongo da, eta Idekoko lankideekin partekatuko ditugu instalazioak. Idekok ikusmen artifizialean esperientzia handiko profesional-taldea du, eta epe laburrean MONDRAGON barruko sinergiak areagotzea espero dugu.

Elgoibarko bulego berria Jon Mataren gidaritzapean egongo da, eta Idekoko lankideekin partekatuko ditugu instalazioak. Idekok ikusmen artifizialean esperientzia handiko profesional-taldea du, eta epe laburrean MONDRAGON barruko sinergiak areagotzea espero dugu.

Nola ikusten duzue Sentinelen etorkizuna epe ertain eta luzera?

Argi dago etengabe aldatzen ari den testuinguru batean gaudela, bai ikuspegi geopolitiko eta makroekonomikotik, bai teknologikotik. Horregatik, gure helburua da Sentinel Mondragon Assembly taldearen barruan azken teknologietan eta industria-esperientzia praktikoan erreferente bihurtzea.

Epe ertainera, horrek esan nahi du ez bakarrik ikusmen artifizialaren arloan erreferente izatea, baita balio erantsi handiagoko sistemen integrazioan ere, non ikusmen artifiziala funtsezko osagaia izango den. Horretarako, Mondragon Assemblyrekin elkarlanean ikusmen-sistema aurreratuak garatzen ari gara, eta arreta berezia jartzen ari gara ekoizpen-kateetan robot humanoideen integrazioan. Izan ere, Sentinel dagoeneko ari da bere burua kokatzen teknologia horren gaur egungo abangoardian.