Orbea saritua izan da 2026ko Euskadi GJHen sarietan

Erreferentziazko topagune bihurtu da Cadena SERek ekainaren 29an antolatutako ekitaldia, zeinak helburu argia duen: hainbat esparrutatik gizarte jasangarriagoa, bidezkoagoa eta inklusiboagoa eraikitzen ari diren ekimenak balioan jartzea. 

Horien guztien artean, gure industria-errealitatearekin bereziki lotzen den aitortza bat nabarmendu zen: Orbeak jasotako Planeta Saria, jasangarritasuna eguneroko ekoizpen-jardueran txertatu daitekeela erakusten duen adibide gisa. Izan ere, Orbeak saritutako proiektuak oso ideia zehatz batetik abiatu da: bere bizikleten enbalajea birpentsatzea. Kooperatibak plastikoa guztiz kendu du bilgarrietatik, eta haren ordez paperezko eta kartoizko soluzio birziklagarriak erabili ditu. Horrek ontziratze-sistema osoa berriz diseinatzea ekarri du, produktuaren kalitate- eta babes-estandarrak mantenduz.

Ekimen horri esker, eragin zuzena eta neurgarria lortu da: bizikleta bakoitzeko 1,35 kilo CO₂ inguru gutxiago isurtzea, erabilera bakarreko plastikoaren murrizketa nabarmena eta, ondorioz, balio-kate jasangarriago baterantz aurrera egitea. Julene Agirrek, Orbeako Ingurumen Saileko kideak, saria jasotzean adierazi zuen: "Bizikletek gure mugitzeko modua alda dezakete, baina haiek nola fabrikatzen ditugun ere oso garrantzitsua da. Guk pedalei eragiten jarraitzen dugu gure ingurumen-inpaktua murrizteko".

"Bizikletek gure mugitzeko modua alda dezakete, baina haiek nola fabrikatzen ditugun ere oso garrantzitsua da. Guk pedalei eragiten jarraitzen dugu gure ingurumen-inpaktua murrizteko"

Sari gehiago

Aurtengo aitortzak Euskadin Garapen Jasangarriko Helburuak bultzatzen ari diren ekimenen aniztasunaren isla da. LaMia Women Hostelek Pertsonak kategorian jaso zuen saria, harrera eta inklusiorako duen eredu berritzaileagatik; Gernika Gogoratuzeko Bakearen Ekonomiaren Laborategiak bizikidetzaren alde egindako lanagatik ere aitortza jaso zuen. Era berean, Bilbao BSRk Kirol Egokituaren bidez duen gizarte-eraginagatik Epaimahaiaren Sari Berezia eskuratu zuen; eta jasangarritasunaren aldeko aliantzak sustatzen dituzten Giroa Veolia, Faes Farma, Vicrila, Deusto Cities Lab eta Alboan Fundazioa ere saritu zituzten Oparotasuna kategorian. Bestalde, Etorkizuna Musikatan proiektuak aniztasun artistiko eta kulturalaren aldeko lana aitortzen duen saria jaso zuen.

Gizarte-proiektuek, berrikuntza-ekimenek eta berdintasunarekin nahiz bakearekin lotutako proposamenek protagonismoa partekatu zuten enpresak, erakundeak eta hirugarren sektoreko eragileak batu zituen jardunaldian.