Quside eta Ikerlanek teknologia kuantikoa aplikatzen dute sektore kritikoen zibersegurtasuna blindatzeko

Quside teknologia-enpresak (Bartzelonan du egoitza) eta Ikerlan zentro teknologikoak aurrerapauso bat eman dute komunikazio digitalak babesteko, sistema kriptografiko aurreratuetan teknologia kuantikoa txertatuz.

Erabiltzaileentzat oharkabean pasatzen den arren, Interneteko, banku-sistemetako, telekomunikazio-sareetako edo industria-azpiegituretako segurtasunaren zati handi bat gako kriptografiko bakarrak eta aurresanezinak sortzeko gaitasunaren mende dago. Gako horiek funtsezko mekanismoen oinarria dira, hala nola autentifikazioa, informazioaren zifratzea edo gailuen eta zerbitzuen arteko komunikazio seguruak ezartzea.

Haritz Saizek adierazi duenez, sistema digital ziberseguruen taldeko ikertzailea eta Ikerlanen proiektuaren koordinatzailea, “egunero erabiltzen ditugun sistema digital gehienak gako kriptografikoen mende daude, eta gako segururik gabe ez dago zibersegurtasunik. Teknologia kuantikoari esker, sistema konbentzionalek baino askoz kalitate hobeko ausazko zenbakiak sor daitezke, eta, hala, gure komunikazioak eta datuak babesten dituzten gako kriptografikoen segurtasuna indartu”. Gako horien gainean eraikitzen dira autentifikazioa, datuen babesa edo informazioaren truke segurua bezalako mekanismoak.

Irtenbideak segurtasuna indartzen du bankuen, garraioaren eta telekomunikazioen sektoreetan eta azpiegitura kritikoetan.

Quside, Zientzia Fotonikoen Institutuko (ICFO) spinoff-a, zibersegurtasun eta errendimendu handiko konputaziorako ausazkotasun kuantikoko soluzioetan eta modulu kriptografikoetan espezializatutako konpainia da. Modulu horiek zenbaki benetan ausazkoak sortzen dituzte –ezin dira aurreikusi patroi edo arau logikorik jarraitzen ez dutelako–, eta modu lokalean egiaztatzen dute haien ausazkotasun-maila, fenomeno kuantikoak aprobetxatuz. Ausazko zenbaki horiek ezinbestekoak dira gako kriptografiko sendoak sortzeko.

Ordenagailu konbentzionalek algoritmo matematikoen bidez sortzen dituzte zenbakiak. Aplikazio gehienentzat aski seguruak diren arren, segurtasuna kritikoa den inguruneetan mugak dituzte. Qusideren teknologiak prozesu kuantikoen izaera aurresanezina aprobetxatzen du kalitate handiko ausazko sekuentziak sortzeko. Gainera, sekuentzia horiek zuzenean egiaztatzen dira sortzen dituen elementuan bertan.

Aro kuantikoaren erronkei aurre egiteko prestatutako PKI plataforma bat

Teknologia hori Lamassun integratu da zehazki. Lamassu gako publikoko azpiegitura-plataforma bat da (PKI), LKS Next-ek garatua Ikerlanen laguntzarekin. Pertsonak, gailuak eta erakundeak modu seguruan komunikatu ahal izateko identitate digitalak sortzen, kudeatzen eta egiaztatzen ditu. LKS Next-ek eta Ikerlanek Lamassu-ko PKI azpiegitura garatzeko duten interesari erantzuten dio aurrerapen horrek. Hala, gakoak sortzeko erabiltzen den ausazkotasunaren kalitatea bermatzen eta egiaztatzen da gauzatze-denboran. Era berean, integrazio horrek erraztu egiten du teknologia kuantikoak erabiltzea segurtasuna baldintza kritikoa den sektore estrategikoetan, hala nola energian, industria konektatuan, garraioan, telekomunikazioetan, bankan edo azpiegitura kritikoetan. 

Adibidez, sare elektriko adimendunek edo garraio-azpiegiturek software eta komunikazioak dituzte, eta manipulazioetatik edo zibererasoetatik babestu behar dira. Baita gure online bankan sartzen garenean edo transferentzia bat egiten dugunean ere, non kriptografiak aldeen egiazkotasuna eta datuen konfidentzialtasuna bermatzen duen.

"Teknologia kuantikoa laborategitik atera eta benetako aplikazioetara iristea erraztea da gure helburua. Qusidek garatutako teknologia kuantikoa sistema kriptografiko errealetan txertatu dugu, eta egungo zibersegurtasuna eraikitzeko funtsezko elementuetako bat indartu dugu", azaldu du Haritz Saizek.

Fernando de la Iglesiak, Qusideren Produktu VPak, adierazi duenez, “Qusideren teknologia integratuz, Lamassuk sistema kriptografikoen segurtasun-posizioa handitzen du, ez bakarrik sortzen duen material kriptografikoaren kalitate handiagoko oinarri bat erabiliz, baizik eta kalitate hori egiaztatzen eta informazio hori maila guztietan sartzen du, gakoen eta ziurtagirien bizi-zikloaren barruan”. 

Bi erakundeen arteko lankidetza Qusidek teknologia kuantikoak industriara eramateko egindako apustuaren emaitza da, eta komunikazio seguruen bezalako esparru estrategikoetan duen posizionamendua indartzen du. Lan-ildo hori sendotzeko, bi enpresek Qusideren teknologia eta Ikerlanen esperientzia uztartzen dituen akordioa sinatu dute berriki, teknologia hori zibersegurtasuneko eta adimen artifizialeko aplikazioetan integratzeko helburuarekin.