Patenteen Kudeaketa Estrategikoari buruzko Ikastaroaren edizio berria

Datorren apirilaren 17an hasiko da Patenteen Kudeaketa Estrategikoari buruzko Ikastaroaren XII. edizioa, Mondragon Unibertsitateak antolatua, Grupo SPRI, Enterprise Europe Network, Innobasque eta Basque Research and Technology Alliance (BRTA) enpresen laguntzarekin.

Ikastaroan aktibo horiek nola kudeatu eta nola erabili aztertzen da, enpresan balioa eta lehiarako abantaila sortzeko

2010eko lehen ediziotik, Ismael Igartua Galbaianeko zuzendariak sortu eta zuzendutako ikastaro honen helburua da profesionalak patenteen mundura hurbiltzea, eta, oro har, jabetza industrial eta intelektualera, ikuspegi estrategiko batetik. Ikastaroan aktibo horiek nola kudeatu eta nola erabili aztertzen da, enpresan balioa eta lehiarako abantaila sortzeko.

Programa negozio-zuzendariei, ETEetako gerenteei, berrikuntza-arduradunei, zuzendari teknikoei, I+G+Bko langileei eta, oro har, patenteak eta PIa enpresa-estrategian nola txertatu ulertu behar duten profesionalei edo IP Managers bezalako erantzukizunak beren gain hartu behar dituzten profesionalei zuzenduta dago.

Info gehiago

Aitor Bustillo (BATZ): "Patenteen ikastaro honek eragin handia izan zuen nire bilakaera profesionalean"

Aurreko hamaika edizioetan 160 profesional baino gehiagok lortu dute ikastaroaren diploma. Horien artean dago Aitor Bustillo, BATZeko Jabetza Intelektualeko arduraduna. Berarekin hitz egin dugu bere esperientzia ezagutzeko.

Noiz egin zenuen ikastaroa eta zerk motibatu zintuen izena ematera?
2012an, laugarren edizioan. Denbora gutxi neraman BATZeko berrikuntza arloan, eta patenteen eta marken arloa kudeatzea tokatzen zitzaidan, nahiko zabala, bide batez esanda. Garai hartan, nire ezagutzak PIri buruzko oinarrizko ikastaro batera mugatzen ziren. Argi nituen oinarriak, baina besterik ez. Makina bat kontu batzen zitzaizkidan. Erabakiak hartzeko eta ekintzak planifikatzeko, ezagutza sakonagoa behar nuen. Galbaianek ikastaroa gomendatu zidan, eta, egia esan, asmatu egin nuen.

Zure esperientziatik, zer nabarmenduko zenuke ikastarotik? Zer ikaskuntza izan ziren baliotsuenak?
Oinarri teorikoa indartsua den arren, haren ikuspegi praktikoa nabarmenduko nuke, hizlariek aldez aurretik ezagutzen dituzte gai konplexuenak eta baita zalantza ohikoenak argitzeko modua ere, bizitza errealeko adibide edo kasuen bidez, eta oso modu atseginean gainera. Blokekako egituraketaren ondorioz, ikastaroaren aurrerapena ordenatua da eta kontzeptuak finkatzeko denbora ematen du. Nire kasuan, nire koadernoan pilatuta neuzkan zalantza asko argitzeko balio izan zidan, adibidez, patenteen espedienteen izapidetze eta kudeaketa administratiboaren esparruan. Baina, batez ere, arau-hausteen analisietan, gerora nire egunerokoan oso erabilgarria izan dena.

Nola lagundu dizu ikastaroak zure garapen profesionalean edo eguneroko lanean?
Ikastaroak autonomia nahikoa eman zidan patenteen eta marken arloa segurtasun handiagoz kudeatzeko gai izateko, eta BATZen PIari buruzko erabakiak hartzeko, kanpoko aholkularien mende egon gabe. Ezagutza horrekin, enpresaren berezko estrategiarekin eta kulturarekin batera, irizpide argia sortu da kooperatibaren aktibo ukiezinak babesteari dagokionez hartu beharreko norabideari buruz. Ildo horretan, esan daiteke ikastaro honek eragin handia izan zuela nire bilakaera profesionalean.

Gomendatuko zenieke ikastaro hau beste profesional batzuei? Batez ere, patenteekin eta markekin kontaktua duten pertsonei gomendatuko nieke, ikastaroak aukera emango dielako zalantza guztiak %100ean argitzeko, eta, gainera, PI puzzlearen pieza guztiak ordenatzen eta egokitzen lagunduko dielako, 360ºko ikuspegia hartuz eta enpresetan arlo horretan erreferente gisa jarriz.