Mondragon Unibertsitateko Patenteen Kudeaketa Estrategikoari buruzko Ikastaroaren XII. edizioa amaitu da

Argazki bilduma

Mondragon Unibertsitateak antolatutako Patenteen Kudeaketa Estrategikoari buruzko Ikastaroaren XII. edizioa amaitu da gaur, patenteen eta, oro har, jabetza industrial eta intelektualaren arloko prestakuntzari eskainitako hainbat saioren ostean. Ikastaroak ikuspegi estrategikoa, kudeaketa eta errentagarritasuna izan ditu ardatz.

Programa Dani Justel Mondragon Unibertsitateko irakasleak koordinatu du, eta Ismael Igartua Galbaianeko zuzendariak zuzendu du. Helburua parte-hartzaileei beren erakundeen estrategietan aktibo ukiezinen kudeaketa txertatzeko beharrezko tresnak eskaintzea izan da.

Enpresen eta zentro teknologikoen parte-hartzea

Aurtengo edizioan, Cikautxo, Orona eta Vidrala enpresetako profesionalek parte hartu dute, baita Ikerlan, Ideko, Cidetek eta  Lortek zentro teknologikoetako kideek ere. Horiez gain, Mondragon Goi Eskola Politeknikoko ikasleek ere parte hartu dute.

Azken saioan, Idoia Apraiz Galbaianeko Jabetza Industrialeko Agente eta Europako Patenteetako Agenteak, erakunde bakoitzaren beharretara eta errealitatera egokitutako jabetza industrial eta intelektualaren arloko estrategia bat ezartzeko gakoak partekatu ditu parte-hartzaileekin. Era berean, aktibo ukiezinen balorazioan sakondu du, bereziki patenteen balorazioan.

Bestalde, Ismael Igartuak ikastaroan parte hartu duten hizlarien ekarpen nagusiak gogora ekarri ditu, haien aipamen esanguratsuenetako batzuk berreskuratuz eta ikastaroan zehar jasotako irakaspen nagusiak laburbilduz.

Diploma banaketa eta ikastaroaren amaiera

Ohiturari jarraituz, Leire Bilbao Innobasqueko zuzendari nagusia arduratu da ikasleei diplomak emateaz, erakundeak prestakuntza-ekimen honi ematen dion babesa agerian utziz.

Innobasquez gain, SPRI Taldea, Basque Enterprise Europe Network eta BRTA ere ikastaroaren laguntzaile izan dira.

Diplomak banatu ondoren, ikasleek eta antolatzaileek lunch batean partekatu dute ikastaroaren amaiera, patenteen kudeaketa estrategikoan espezializatutako programa honen beste edizio bati amaiera emanez.