MONDRAGON, protagonista BIND Demo Day ekitaldian

Eusko Jaurlaritzako Industria, Trantsizio Energetiko eta Jasangarritasun Sailaren eta SPRIren ekimena da BIND, eta joan den uztailaren 3an, Kursaal Jauregian, egin zuen Demo Day 2025 urteroko berrikuntza ekitaldia. Hitzordu horretan, 20 startupek 30 berrikuntza proiektu aurkeztu zituzten, ETEekin eta euskal korporazio handiekin lankidetzan garatutakoak, eta Euskadiko ekosistema ekintzaile eta industrialeko 400 profesional baino gehiago bildu ziren, besteak beste, MONDRAGONekoak.

Bertan izan ziren, hala nola, Eroski, Danobatgroup eta Erreka kooperatibak. Izan ere, 70 korporatibok baino gehiagok hartu dute parte ekimen ireki liderraren bederatzigarren edizio honetan, eta 24 proiektu gauzatu dira, horietatik %25 MONDRAGONeko bost kooperatibak gauzatu dituztenak: Eroski, Erreka, Copreci, Danobatgroup eta Mondragon Ventures.

BIND plataforma publiko-pribatua nazioarteko erreferente gisa finkatu da berrikuntza irekian, industria sareari eta ekintzailetzari emandako babesagatik. Korporazio, ETE eta sozietate publikoekin startup disruptiboak konektatzea du helburu, Corporate, SME eta GovTech ekimenen bidez. 2016an jarduera hasi zuenetik, 250 startup eta 350 proiektu baino gehiago bizkortu ditu, 9,6 milioi euroko fakturazioa gaindituta.