M&A operazioak, MONDRAGONen Finantza Foroaren IX.edizioaren arlo nagusi

MONDRAGONeko kooperatibetako finantza-arduradunentzat egun garrantzitsua izaten da Finantzen Foroa. Interkooperazio ariketa praktiko bikaina. Aurten, bederatzigarren edizioan, esperientziak trukatzeko topagune baliotsu eta beharrezko gisa finkatu da.

MONDRAGONeko IX. Finantza Foroko argazkiak

MONDRAGONeko Kontseilu Nagusiko presidenteak, Pello Rodriguezek, ireki zuen Foroa eta bertaratu zirenei finantza sailetan egiten den lanaren garrantzi estrategikoaren berri eman zien, "balantzeei buruz gutxi hitz egiten delako".

Ondoren, 2025-2028 Politika Sozioenpresarialaren 4 ardatzetatik eratorritako 15 proiektu estrategikoetako bitan sakondu zuten. Proiektu horiek bi tresna korporatibok finantzatzen dituzte: MONDRAGON Fundazioa eta MONDRAGON Inbertsioak: Zorrotzaurreko (Bilbo) ekosistema eta profil digitalen inguruko proiektu berria eta negozio berriak aktibatzeko dinamika berria.

Pello Rodriguez

Mondragon Unibertsitateak Zorrotzaurren (Bilbao Bizkaia Digital Factory) gidatzen duen proiektuari dagokionez (ezagutzak, teknologiak, talentuak eta enpresak bat egingo duten gunea), Rodriguezek esan zuen MONDRAGON Fundazioak 10 milioi euroko laguntza ematen duela proiektua finantzatzeko 2028ra arte, eta atzerriko unibertsitateek ere parte hartuko dutela, hala nola Mondragon Mexikok, Monterreyko Unibertsitateak (Mexiko) eta Georgia Techek (Estatu Batuak). Hori guztia, kooperatibak indartzeko, profil digitalak beharrezkoak baitira,"negozio tradizionalak baino 7 aldiz gehiago hazten den" esparrua baita.

Negozio berrien inguruan, Rodriguezek nabarmendu zuen kooperatiben ahalegina "% 75 negozioak indartzeko bideratzen da eta % 25 jarduera berriak bilatzeko, horietako asko startupetan"

Azpimarratu zuen arlo horretan  zeregin garrantzitsua duela Ezagutza Dibisioak, "unibertsitatearekin eta zentro teknologikoekin, patenteekin, bideragarriak diren eta lanpostuak sortzen dituzten proiektuetan". Rodriguezek Orbik, sortu berri den startup kooperatiboaren kasua jarri zuen adibidetzat.

Bere hitzaldiari amaiera emateko, kooperatiben balantzeari azken begirada eman zion, eta MONDRAGON Inbertsioak erakundean jarri zuen arreta: "Kooperatiben balantzean agertzen da, baina ez bere errendimendua behatzeko; sortu dituen enplegua eta negozio berriak balioetsi behar dira, eta MONDRAGON Inbertsioen babesean sortu diren proiektu berriei buruz hitz egin behar dugu".

Ricardo Santamariaren hitzaldia (CESCE)

Ricardo Santamariak, Cesceko Arrisku Herrialdeko eta Zorraren Kudeaketako zuzendariak, nahiko ikuspegi baikorra eskaini zuen nazioarteko testuinguru konplexuaren barruan. Arriskuak eta ziurgabetasuna gorabehera, "aukerak egon badaude eta aprobetxa daitezke: Bost urte daramatzagu hondamenezko gertaerak entzuten eta aldaketa disruptiboak gertatzen... baina esportazioak hazi egiten dira, nazioarteko enpresak erresilienteagoak dira... bide horren alde egin behar da", azpimarratu zuen, eta gaineratu zuen arriskuaren kudeaketa lehiakortasunerako funtsezko tresna dela gaur egun.

Santamariak mundu multipolarra deskribatu zuen non Txina eta BRICS erakundeko herrialdeek hazi egin diren eta ekialdeak lidertza galdu duen.

Aldaketa horrek autonomia estrategikorako eta protekzionismorako joera bultzatzen du, eta, adierazi zuenez, "geratzeko iritsi da". Europako paperari dagokionez, bere ahulezia geoekonomikoaz ohartarazi zuen, eta Estatu Batuekiko merkataritza akordioa asimetrikotzat jo zuen, nahiz eta muga-zergen gerrak saihesteko baliagarria izan. Euskadiren kasuan, "AEBra egindako esportazioen % 15eko muga-zergek erronkak ekarriko dituzte, batez ere prezioarekiko sentikorra den eskaria duten sektoreetan".

2026ra begira, hazkunde moderatua aurreikusten du — Asiak gidatua eta Europa atzean duela —, euroaren eta dolarraren arteko egonkortasuna eta potentzien arteko lehia nagusi den eszenatokia, eta defentsan inbertsio handiagoa. Azken mezuan berriz ere azpimarratzen du "informazioa edukitzearen eta arriskua modu adimentsuan kudeatzearen garrantzia, mundu aldakor batean aukerak aprobetxatzeko funtsezko elementu gisa.

Kooperatiben negozioaren hazkundea

MONDRAGONeko Finantza Kudeaketako zuzendari Olatz Imazek MONDRAGON Finantza Foroaren edizioa aurkeztu zuen. Foroaren izenburua "M&A gure negozioak eraldatzeko baliabide estrategiko gisa" izan da, erosketa-eragiketek (M&A) negozioa dibertsifikatu, sinergiak bilatu, teknologia eskuratu edo talentua erakarri nahi duten kooperatibentzat duten aukerari erreferentzia eginez. Hori guztia Zentro Korporatiboaren lankidetzako testuinguru batean, eremu bakoitzeko erakunde korporatiboen laguntzarekin. Zentzu horretan, MONDRAGONeko kooperatiben lau esperientzia azaldu ziren.

>AUSOLAN: Eneko Blanco, Finantza zuzendaria

Ausolan %45 hazi da fakturazioan azken hamar urteotan, eta hazkundea bideratzeko estrategia enpresa erosketa izan da. Guztira 7 operazio burutu dituzte azken bost urteotan.

Bere eskuratze-politika jabetzaren %100 lortzeko aukera ematen duten eragiketetan oinarritzen dela azpimarratu zuen, aurretik ugazaba jabetzaren egituran mantendu gabe.

>CIKAUTXO: Jon Bilbao, Finantza zuzendaria

Bereizi egin zituen Europako hazkundea (enpresa-merkatu eta -kultura ezagutu daitezkeenak) eta munduko gainerako lurraldeak (dena da zalantzagarriagoa).

Europa enpresa-merkatu eta -kultura aintzatesgarri batean oinarritzen dela azaldu zuen, eta, beraz, eremu egokia dela hazkunde organikorako. Baina munduko gainerako lekuetan, tokiko bazkideen beharra, lehen fase batean behintzat, beharrezkoa da (Brasil, India). Hainbat erakunde korporatiboren lankidetza nabarmendu zuen, hala nola MONDRAGON Internacional, MONDRAGON Inversiones edo Korporazioko Arriskuen Kudeaketa departamentua.

>COPRECI: Olatz Muruamendiaraz, Finantza zuzendaria

Copreci duela urte askotatik nazioartekotutako kooperatiba bat da, atzerrian 7 lantegi dituena. Hazten jarraitu nahi du, bere katalogoan produktu berriak sartuz, hobeto lehiatzeko.

M&A eragiketak know how eta produktua azkar eskuratzea bezala hartzen dira, produktua garatzeko politikaren aldean, epe luzea eskatzen baitu. Eragiketa horietan, kanpoko lege-aholkularitza kontratatzen dute, eta eragiketa horiek gauzatzeko prozesuaren buru izatea kanpo-eragile horiei dagokie. Muruamendiarazek oso positibotzat jo zuen MONDRAGON Inbertsioen partaidetza.

>DIKAR: Edurne Llaguno, Finantza zuzendaria

Dikarrek duela gutxi erosi du Ternuaren negozioa, MONDRAGON Inbertsioen partaidetzarekin.

Dikarren, AEBko merkatuarekiko esposizio handia zuen negozio bat dibertsifikatzeko beharra ikusi zuten. Testuinguru horretan, outdoor negozioaren hazkundea arrazoi ona zen eragiketaren aldeko apustua egiteko, DIKAR jada presente baitzegoen merkatu horretan, Columbus markarekin. Ternuaren erosketan markaren jarraipena eta tokiko talentuaren atxikipena oso aldagai garrantzitsuak direla baieztatu zuen.

Jardunaldiaren bigarren zatian, hazkunde ez-organikoko eragiketetan eta horiek dakartzaten arriskuetan sakontzen jarraitu zen, sektorean ospe handia duten bi eragileren parte-hartzearekin, hala nola Norgestión eta AON.

Norgestioko presidente José Antonio Barrenak M&A prozesu baten fase guztiak aurkeztu zituen hasieratik amaieraraino, MONDRAGONeko enpresen eta beste hirugarren batzuen adibide praktikoekin. M&A-rako motibazioez, M&A motez, balorazioez, problematikez eta erosketa-prozesu batean konpainia batek aurre egin beharreko arriskuez hitz egin zuen. Prozesu arrakastatsu baterako ondorioekin eta gomendioekin amaitu zuen.

Bestalde, Valentina Murgantik AON M&A and Transaction Solutions erakundearen Iparraldeko zuzendariak M&A enpresaren eragiketetan arriskuak kudeatzeko tresna estrategikoak aurkeztu zituen. Aurkezpenaren helburua hazkunde ez-organikoan zer arrisku mota egon daitezkeen eta arrisku horiek arintzeko zer tresna erabil daitezkeen ezagutaraztea izan zen.

MONDRAGONen IX. Finantza Foroaren amaieran, lunch bat egin zen. Bertan, parte-hartzaileek horrelako eragiketek dakartzaten erronkei buruz hitz egiten jarraitu zuten. Eragiketa horietan, MONDRAGONeko kooperatibek jarduera aipagarria dute negozioak indartzen eta enplegua sortzen jarraitzeko.