Laboral Kutxa, Espainiar estatuko bigarren banketxerik onena Forbes aldizkariaren arabera

Openbank, Laboral Kutxa, Bankinter eta BBVA dira Estatu espainiarrean egoitza duten lau finantza-erakunde onenak, Forbes aldizkari ospetsuak egindako Munduko banku onenei buruzko urteko VI. Txostenaren arabera. Txostena bezeroei egindako inkestetan dago oinarrituta, eta banketxeek bezeroei emandako arretarekin eta jasotako zerbitzuekin duten gogobetetzea baloratzen da.

33 herrialdetako 403 banku aztertzen dituen hautaketa honetan, Espainiari dagokion zerrendan herrialdean jarduten duten beste erakunde batzuk ere agertzen dira, naiz eta egoitza Estatuan izan ez. Hala, lehenengoa ING holandarra da; hirugarrena, Revolut lituaniarra eta bosgarrena, N26 alemaniarra.

Estatuan kokatutako erakundeei dagokienez, Openbank, Santander Taldearen 'online' bankua, bigarren postuan ageri da; LABORAL Kutxa, MONDRAGON Korporaziokoa, laugarren postuan; Bankinter, seigarrena; BBVA, zazpigarrena; Imagin Bank, CaixaBanken banka digitala, zortzigarren; eta Banco Santander bera, bederatzigarren.

Bezeroen gogobetetasuna

Urteko sailkapena egiteko, finantza-erakundeen balantzeak eta emaitza-kontuak aztertu beharrean, Forbesek, Statista merkatu-ikerketako enpresarekin batera, 33 herrialdetako 49.000 pertsonari baino gehiagori egin zizkien galdetegia, 17 hizkuntza desberdinetan.

Horietan, azken hiru urteetan kontuak izan dituzten bankuak ebaluatzeko eskatu zitzaien parte-hartzaileei. Inkestatuek erakunde bakoitzarekin duten poztasun orokorra adierazi zuten, baita beste pertsona batzuei gomendatuko lieketen ere, eta, ondoren, bakoitza bost irizpideren arabera kalifikatu zuten: fidagarritasuna, terminoak eta baldintzak (ordainsariak eta tasak), bezeroarentzako zerbitzua (itxaronaldiak eta enplegatuen adeitasuna), zerbitzu digitalak (webgunea eta aplikazioa erabiltzeko erraztasuna) eta finantza-aholkularitzaren kalitatea.