Kooperatibetako bazkide berrientzat ikastaroa sortu du Lanki ikertegiak

Kooperatibetako bazkide berriei zuzendutako ikastaro berria sortu du Mondragon Unibertsitateko Lanki Kooperatibismoaren Ikertegiak: "Murgiltzen: Harrera Plan Kooperatiboa".

Martxotik uztailera bitartean Fagor Taldeko kooperatibetako bazkide berriekin egin da proba pilotua, eta irailetik aurrera modu zabalean eskaini ahalko da MONDRAGON Korporazioko gainerako kooperatibetan.

Aurrez aurreko saioak Otaloran

Egun bakarreko harrera planak egitetik harago, bazkide berrien harrera hainbat astetan lantzen da Harrera Plan Kooperatiboan. Planak eskaintzen du prozesu aktiboa eta askotarikoa, bidelaguntza eta jarraipena, eta bazkideen prozesu autonomoaren bateragarriak diren aurrez-aurreko saioak.