Kooperatibek izan ditzaketen klima arriskuak aztertu ditu Kreanek

Joan den irailaren 17an Garaia Parke Teknologikoan (Arrasate, Gipuzkoa) egindako Jasangarritasun Foroan aurkeztu zuen KREANek azterketa. Hain justu ere, Euskadin eta Nafarroan kokatutako MONDRAGONeko kooperatiben arrisku fisikoei erantzuten die. Azterketan, guztira, 212 kooperatiba eta sozietate sartu dira, 100 kokapenetan kokatuak, eta Euskadiko eta Nafarroako 50 udalerri hartzen ditu.

Arriskuak, batez ere, tenperaturen igoerarekin eta uholdeekin daude lotuta, eta horrek gure kooperatibetan duen eraginarekin

Arrisku fisikoak

Aztertutako arriskuek eragin ditzaketen inpaktuen artean daude tenperaturen eta bero-boladen igoera, pertsonen osasunerako arriskuak, kanpoko eta barruko erosotasun-falta eta energia-eskariaren hazkundea. Ibaien gainezkatzeek eta itsas mailaren igoerek eragindako uholdeei dagokienez, balizko inpaktuek errepideak buxatzea, hornidura elektrikoa etetea eta uholdeen ondorioz eraikinetan, instalazioetan eta azpiegituretan kalteak eragitea dakarte.

Era berean, klima-aldaketari aurre egiteko erresilientzia-neurri batzuk jasotzen ditu azterlanak. Adibidez, energia-eraginkortasuna hobetzea eta energia-trantsiziorako alternatibak aztertzea, bero-uhartearen efektua prebenitzeko jarduketak egitea muturreko tenperaturen aurrean, ibaien uholde-arriskua murriztea eta erresilientzia itsas mailaren igoeraren aurrean.