Fagor Taldeak Tokixan egitasmoa babestuko du, elikadura burujabetzan sakontzeko

Debagoieneko elikadura kate osoa, ekoizpenetik kontsumora artekoa, barnebilduko duen tokiko elikadura sistema eraikitzea da Tokixan proiektuaren xedea, agroekologiatik eta eredu kolektibotik. Debagoiena 20230 lankidetza sareak duela bost urte eginiko gogoeta du oinarri egitasmo honek.

Aritz Otxandiano: "Eredu bideragarri bat landu beharra dago, ekoizleen lan baldintzak hobetu eta errelebo aldaketa bermatzeko"

Bultzatzaileen hitzetan, ekoizpenean diharduten langileen lan baldintzak eta lehen sektorearen bideragarritasuna bermatzea lekarke horrek, eta, beraz, etorkizunean ere tokiko elikagaiak, kalitatezkoak, osasuntsuak… kontsumitzeko aukera izatea. Udalak, Debagaraia Landa Garapenerako Elkartea, elikadura topaguneak, ekoizle taldeak, kooperatibak… daude lankidetza sarean, tartean, Fagor Taldea.

Ekarpen ekonomikorako konpromisoa hartu du Fagorrek, eta Fagor Ederlaneko Bergarako lantegiko jangela eskaini du banaketa eta kontsumoari lotutako proba pilotua egiteko. Horrek ahalbidetu du jangelen horniketari lotutako prozesua sistematizatzea eta kudeaketa eraginkor bat lantzea.

Aritz Otxandiano Fagor Taldeko Iraunkortasun arduradunak azaldu duenez, "eredu bideragarri bat landu beharra dago", ekoizleen lan baldintzak hobetu eta errelebo aldaketa bermatzeko: "Elikadura kate osoa barnebilduko duen eredu berri bat sortzea eskatzen du horrek, ekoizte hutsetik harago, banaketa barne hartu, eta, besteak beste, jangelak kudeatzen dituzten eragileen konpromisoa behar duena".