Fagor Ederbatt, Dakarreko historiako lehen kamioi hibridoaren bultzatzaile

Gaur hasiko den Dakar Rallya motorraren munduko proba-laborategi zorrotzena da, eta aurtengo edizioan aurrekaririk gabeko pausoa emango du mugikortasun jasangarriaren bidean. KH-7 ECOVERGY taldeak —Jordi Juvanteny eta José Luis Criado beteranoak eta Xavier Ribas ingeniaria buru dituela— historiako lehen kamioi hibridoarekin (hidrogenoa eta elektrikoa) hartuko du irteera.

Berrikuntza teknologiko horren muinean Fagor Ederbatt dago. Hidrogenoaren erabileran lehendik ere aitzindari zen MAN 6x6 kamioia berritu egin dute aurten; zehazki, hibridazio elektriko sistema bat gehitu diote, eta horretarako ezinbestekoak diren bateriak gure kooperatibak hornitu ditu.

Teknologia aurreratua muturreko baldintzetarako

Aurtengo edizioko berrikuntza nagusia kamioiaren efizientzian datza: hidrogenoa eta diesel berriztagarria erabiltzeaz gain, Fagor Ederbatten bateriek elikatutako motor elektrikoaren bultzada ere izango du. Sistema honek aukera ematen du:

• Energia berreskuratzeko: balaztatzean eta dunetako jaitsieretan sortzen den energia aprobetxatzen da.

• Indarra gordetzeko: jasotako energia hori Fagor Ederbatten bateria-packetan metatzen da, ondoren, potentzia handia behar den uneetan motor nagusiari laguntzeko.

• Isuririk gabe gidatzeko: sistemari esker, tarte laburretan %100 elektrikoan gidatu daiteke (zero isurpeneko moduan); aurrerapauso itzela probaren deskarbonizazioan.

Elkarlan honek agerian uzten du Fagor Ederbatt erreferente bihurtu dela ibilgailu industrial eta astunen elektrifikazio prozesuan.