Eraginkorragoa, ziberseguruagoa eta hodeira konektatutako bateria-eredu berria diseinatu dute Ikerlanek eta Cegasak

Energia-biltegiratzeko soluzioetan 90 urteko ibilbidea duen Cegasa Energia, Europako erreferentea den konpainiak, urrats bat gehiago egin du baterien garapen eta fabrikazio aurreratuan aditu gisa duen estrategian, Ikerlan zentro teknologikoarekin duen lankidetzari esker. Elkarlan horri esker, eraginkortasun, zibersegurtasun eta hodeiko konektagarritasunean gaitasun berriak sustatuko ditu bere sistema energetikoetarako. 

 

Aliantza honetan, Cegasa Energiak MONDRAGONen beso teknologikoaren gaitasun multiteknologikoan oinarritu da, Adimen Artifizialeko, Zibersegurtasuneko eta Sistema Elektroniko Txertatuetako taldeak martxan jarriz. Guztira, 10 profesional baino gehiagoko talde bat ari da aurrerapen horien garapenean parte hartzen. Horren guztiaren helburua da bateria industrialak sistema adimendun bihurtzea, haien kontsumoa kudeatzeko, ingurune industrialetan integratzeko eta etorkizuneko funtsezko arau-eskakizunetara egokitzeko (adibidez, jasangarritasunera eta zibersegurtasunera). 

 

“Merkatuko soluzio guztiek ez dute zibersegurtasuna diseinu-fasetik bertatik txertatzen. Prebentzio-ikuspegi hori, 2027ko Europako araudiarekin bat datorrena, elementu bereizgarria eta aurreratua da argi eta garbi”, azaldu du Miguel Encabok, Cegasa Energiako I+G taldeko kideak. “Proiektuak, berrikuntza-maila handiarekin, duela urte gutxi imajinaezina izango litzatekeen epean egin da, eta urtebete eskas baino gutxiagotan soluzio sendo eta fidagarri bat izatea ahalbidetu du. Zentzu berean, teknologia hori duten CEGASA Energiaren produktuak 2026. urtearen hasieran martxan egotea aurreikusten da”. 

 

Bestalde, Rubén del Cura, Ikerlaneko Gauzen Adimeneko taldeko ikertzaileak, honako hau adierazi du: “Gaur egun, merkatuan ez dago baterien kudeaketa energetikorako adimen artifizialeko (AA) ereduak sakontasunez integratzen dituen produktu komertzialik. Cegasa Energia, Ikerlanekin batera, joerei aurrea hartzen ari da, elektronika aurreratua, AA, zibersegurtasuna eta hodeiko konputazioa konbinatzen dituen soluzio bat garatuz. Proposamen berritzailea da, sektoreak datozen urteetan eskatuko duenarekin bat datorrena”. 

 

Ildo horretan, bi  enpresen arteko lankidetza bateria konektatuak eta urrunetik eguneragarriak izango dituen ekosistema baterantz garatzea du helburu, erabiltzailearen beharretara egokituz software-modulu berriak integratzeko gaitasunarekin. 

 

ECS oinarri duen jauzi teknologikoa: pentsatzen, moldatzen eta integratzen diren bateriak 

 

Proiektuak ECS (Extended Control System) teknologiaren bilakaera sakona du Cegasa Energiak bere energia metatzeko sistemen nukleo adimendun gisa erabiltzen duen teknologia. Horrela, ECSk kontrol-sistema hedatu gisa jarduten du, bateriaren azpisistema guztiak (BMS, PCS, segurtasuna, komunikazioak) monitorizatu eta koordinatzen ditu, IoT konektibitatea eta hodei-plataformekin komunikazioa gaituz, eta energia-kudeaketako funtzioak integratuz. 

 

Lankidetza honi esker, ECSk segurtasun-arloan gaitasun berriak eskuratzen ditu, bai maila fisikoan (safety), bai digitalean (security). Horretarako, egoera kritikoetan bateriek igor ditzaketen gasak detektatzen dituzten sentsore aurreratuak txertatzen ari dira, suteak edo akats termikoak prebenitzeko asmoz. Era berean, azken hozte-teknologiak, gelaxken kontrola eta konposizio kimikoa ere ikertzen dira, errendimendua eta fidagarritasuna hobetzeko. 

 

Bilakaera horrek aukera ematen dio Cegasa Energiari bateriak konektatuak, eguneragarriak eta urrunetik kudeagarriak izango dituen eredu baterantz aurrera egiteko, ingurune industrial konplexuetan funtzionatzeko prestatuta eta datozen urteetako araudi-baldintzak betetzeko moduan. 

 

Jasangarritasunari dagokionez, hobekuntzek aukera ematen dute autokontsumoa maximizatzeko, sarearekiko mendekotasuna murrizteko eta aplikazio zorrotzetarako bidea zabaltzeko, itsas garraiorako edo eskala handiko biltegiratzerako kasu. Horrez gain, bi erakundeak battery passport baten garapenean ari dira, etorkizuneko Europako araudiarekin bat datorrena, zeinak bateria bakoitzaren bizi-zikloa erregistratuko duen eta bigarren bizitza batean berrerabiltzea erraztuko duen. 

 

Ikerlanekin egindako lankidetzari esker, energia-biltegiratzearen arloko erreferente den enpresak bere ECS teknologia indartu du, bateriei denbora errealeko monitorizazio eta optimizazio jarraituaren gaitasunak emanez, eta dagoeneko baliozkotzen ari dira laborategia eta instalazio erreala energia fotovoltaikoarekin konbinatzen dituen pilotu batean. Epe ertainera, espero da ECSak adimen artifizial prediktiboko ereduak exekutatu ahal izatea unitate bakoitzaren iraupena eta energia-errendimendua maximizatzeko, eta horrela estrategia energetiko eraginkorragoen garapena bizkortzeko. 

 

Cegasa Energiari buruz 

 

Cegasa Energia energia-biltegiratze produktuak fabrikatzailea eta soluzioak eskaintzen dituen enpresa da 1934an sortu zenetik, konpainiaren negozioa beti egon da lotuta energiaren metaketa elektrokimikoarekin. 

  

Konpainia espezializatuta dago energia berriztagarriei eta mikrosare adimendunei loturiko biltegiratze-sistema eta produktu geldikorren diseinuan eta fabrikazioan. CEGASAren teknologiak trantsizio energetikoan eta ekonomiaren neutraltasun klimatikoko ibilbide bat sendotzen laguntzen du, energia (litioa) biltegiratzeko proposamenaren bidez, eta hirigune adimendunetan aplikazio propioetan erabiltzen diren iraupen luzeko pilei esker, hala nola airearen eta kutsaduraren kalitatea neurtzea, lurrikarak kontrolatzea edo bide-seinaleak jartzea (zink-airea).Web orria: www.cegasa.com.