Automobilgintza eta etxetresna elektrikoen sektoreetako birziklapena iraultzera dator Primus proiektua

Erreferentea Automoziorako dekorazioan eta piezen konplexutasun funtzionalean.

Kautxuz eta plastikoz egindako soluzio berritzaileak.

Europako Primus proiektua mugarria jartzen ari da polimero birziklatuak automobilgintzako eta etxetresna elektrikoetako sektoreetan integratzeko. Primus ekimen aitzindaria da ingurumen-erronka hori aukera bihurtzeko.

Card image cap — Joan den maiatzean Tallinen (Estonia) egindako Primus partzuergoaren azken bilera.

2024/09/25

Abian jarri zenetik, Primus proiektuak, Europako Batzordeak sustatua eta MONDRAGON zentro korporatiboak eta Maier eta Cikautxo kooperatibek parte hartzen dutena, azkar egin du aurrera soluzio jasangarrien garapenean, eta 3 urtetik 6ra pasa da heldutasun teknologikoaren maila (TRL) bi urtean. Aurrerapen horren bidez, proiektuak lau prototipo sortu ditu, dagoeneko industriaurreko aplikazioetan probatzen ari direnak.

Berrikuntza automobilgintzan eta etxetresna elektrikoetan

Automobilgintzaren sektorean funtsezko bi pilotu garatzen ari dira. Maierrek gidatzen du lehena, birziklatutako plastikoen % 90 duten ibilgailuen barruko piezen fabrikazioarekin. Proiektu honek, estetikaz gain, segurtasun eta osasungarritasun araudi zorrotzak betetzen ditu. Bestalde, Cikautxo bigarren pilotu bat garatzen ari da, automobilentzako hozte-hodiak sortuz, % 25 birziklatutako materiala izanik.

Primusen eragina etxetresna elektrikoen sektorera ere hedatzen da. Bi proiektu pilotuk plastiko birziklatuen erabilera optimizatu nahi dute: bata garbigailuen muflentzat, Cikautxo buru dela, % 20ko material birziklatuarekin, eta bestea hozkailuen barrualderako, elikagaiekin kontaktua izateko Europako erregulazioekin lerrokatuta.

Primus automozioaren eta etxetresna elektrikoen sektoreentzako etorkizun iraunkorrago baterako bidea markatzen ari da, ekonomia zirkularrerako beharrezko trantsizioa posible dela erakutsiz.

Aldaketarako nazioarteko partzuergoa

Primusen arrakasta, neurri handi batean, nazioarteko 12 bazkideren lankidetzari zor zaio, horien artean VTT Technical Research Centre of Finland eta etorkizunera begira dauden Maier eta Cikautxo aktore industrialak nabarmentzen direlarik. Partzuergo honek erakutsi du jasangarritasuna eta errendimendu industriala batera joan daitezkeela, kalitate eta segurtasun estandar altuenak betetzen dituzten plastiko birziklatuak garatuz.

Proiektua bere azken fasean sartzen den heinean, Primus erreferente gisa kokatzen ari da birziklatze industrialean. Bere ibilbideak erakutsi du industriaren eta akademiaren arteko lankidetzak benetako irtenbideak eskain diezazkiekeela ingurumen-erronka globalei, kalitatea arriskuan jarri gabe praktika jasangarriagoak sustatuz.