INPAKTUDAY 2026, gazteen ahotsa eta ideiak erdigunean jarriko dituen topagunea

INPAKTUDAY 2026 azaroaren 26an egingo da, Gasteizko Jardines de Uleta hotelean, 09:30etik 17:30era. Aurtengo edizioak ikuspegi berria izango du: gazteak ez dira etorkizuneko protagonistak soilik, orainaren parte aktiboa ere badira. Horregatik, gazteen kezkak, ideiak eta proposamenak partekatzeko eta haien ekarpenak aitortzeko topagunea izango da jardunaldia.

Askotariko gaiak jorratuko dira egunean zehar, besteak beste, adimen artifizialari, robotikari, jasangarritasunari, pertsonei eta osasunari lotutakoak.

Gazteak, orainaren protagonistak

Ekimenak gazteen eta MONDRAGONeko kooperatiben arteko harremanak sendotzea du helburu, baita erakundeen, hezkuntzaren eta gizartearen arteko elkarrizketa sustatzea ere. 250 gazte inguru bilduko dira aurtengo INPAKTUDAYn, tartean, besteak beste, Harrobia Programako parte-hartzaileak, TFG TFM MONDRAGON Sarietako finalistak eta parte-hartzaileak, eta Shaking HUBeko komunitateko kideak. Aurten, gainera, ekimenak gonbidapen irekia egingo die gaiarekin interesa duten gazte guztiei, haien kezkak, ideiak eta proposamenak partekatzeko eta gaur egungo erronkei buruz elkarrekin hausnartzeko aukera eskainiz. Hala, gazteen eta kooperatibetako profesionalen arteko harremanak sustatzeaz gain, gazte gehiagoren parte-hartzea eta ekarpenak bultzatu nahi ditu jardunaldiak.

250 gazte inguru bilduko dira aurtengo INPAKTUDAYn, tartean, besteak beste, Harrobia Programako parte-hartzaileak, TFG TFM MONDRAGON Sarietako finalistak eta parte-hartzaileak, eta Shaking HUBeko komunitateko kideak. Aurten, gainera, ekimenak gonbidapen irekia egingo die gaiarekin interesa duten gazte guztiei.

Erakundeetako eta kooperatibetako ordezkarien arteko elkarrizketak

Iban Garciak dinamizatuko du eguna. Goizeko elkarrizketetan, hainbat arlotako ordezkariek gazteen eta gizartearen arteko harremana aztertuko dute. Pello Rodriguez MONDRAGONen presidenteak kooperatibagintzaren eta gazteen arteko loturaz hitz egingo du; Saray Zárate Fernández de Landa Arabako Foru Aldundiko Ekonomia Garapen eta Berrikuntzako diputatuak, berriz, lurraldearen eta gazteen arteko harremana landuko du.

Teknologiak eta berrikuntzak ere izango dute lekua jardunaldian, Ion Etxeberria Ikerlaneko zuzendari nagusiaren eskutik. Horrez gain, Kristina Apiñaniz Arabako Industria Ingeniarien Elkargo Ofizialeko dekanoak eta Estibaliz León 42 Urduliz Bizkaiako zuzendariak gizarteaz, hezkuntzaz, prestakuntzaz eta inpaktuaz arituko dira.

Podcastak, networking-a eta esperientzia partekatzeko aukerak

Egitarauak elkarrizketak ez ezik, parte-hartzea eta harremanak sustatzeko jarduerak ere bilduko ditu. Goizean, podcast tematikoak eta networking tarteak egingo dira. Formatu horien bidez, parte-hartzaileek esperientziak partekatu eta gai desberdinen inguruko ikuspegiak trukatzeko aukera izango dute.

TFG TFM MONDRAGON Sarien finalisten lanak, ikusgai

Gazteen talentuak eta ikerketak ere protagonismo berezia izango dute. 13:15etik aurrera, TFG TFM MONDRAGON Sarien finalistek beren gradu eta master amaierako lanak aurkeztuko dituzte. Arratsaldean, 16:00etan, sari-banaketa egingo da, gazteek egindako lanen eta ekarpenen balioa aitortzeko.

Laboral Kutxa, Danobatgroup, Fagor Taldea, MONDRAGON, MONDRAGON Health, Ikerlan, Eika eta Mundukide dira aurtengo sari-banaketako kooperatiba-babesleak.

INPAKTUDAY 2026k, beraz, elkartzeko eta elkarri entzuteko espazioa eskainiko du, gazteen eta profesionalen arteko harremanak indartzeko eta etorkizuneko erronkei elkarrekin erantzuteko. Jardunaldiaren ardatza argia da: gazteen ahotsa entzutea, haien ekarpenak aitortzea eta gaurtik bertatik eraldaketan parte hartzeko aukerak sortzea.

Izen-emateko epea azaroaren 9an amaituko da, eta esteka honen bidez egin daiteke: https://l.mndrgn.com/ge8o1