Stirling Zentroak bideoa aurkeztu du iraileko Nazioarteko Kongresuaren atarian

Stirling Zentroa burubelarri ari da Stirling Teknologiaren hamaseigarren Nazioarteko Kongresua prestatzen. Mundu mailako ekitaldia izango da Bilboko Euskalduna Jauregian egingo dena eta mundu osoko adituak ekarriko ditu Euskal Herrira.

Eusko Jaurlaritzako eta Aldundiko ordezkariekin batera, besteak beste, Paul Verhoef, energia berriztagarrien europear komisarioa eta Carlo M. Bartollini, Stirling Internationaleko presidentea izango dira.

Horren harira, Stirling Zentroak, Eusko Jaurlaritzako Agente Zientifiko Teknologiko denak eta Euskadiko Zientzia, Teknologia eta Berrikuntzako kideak, bideoa editatu du bere aktibitatearen berri emateko eta iraileko Kongresuaren berri emateko.

2009tik lanean

Stirling Zentroa 2009an sortu zen eta ordutik lanean dihardu energia jasangarrien arloan, eta batez ere energia horrek egunerokotasunean etxean izan dezakeen aplikazioetan lanean. Mondragon Osagaien barne sortu zen eta MONDRAGON Korporazioko kide da. Hain justu ere, Stirling Zentroaren sorreran, besteak beste, honako kooperatibek parte hartu zuten: Copreci, Eika, Embega, Fagor Elektronika, Matz-Erreka, Orkli eta Tajo. Enpresa horiei guztiei erantzun koordinatua emateko asmoarekin sortu zen eta Berrikuntza eta Garapen proiektu bateratuak sustatzeko helburuarekin.

Bideo dinamikoa

Stirling Zentroak editatutako eta Arteman Komunikazioak post-produzitutako bideoaren helburua da berrikuntza gunearen aktibitatearen berri ematea eta mundura hedatzea egiten duen lana. Era dinamikoan, soilik ingelesez, Zentroaren ezagutza eremuak, kokagunea, kolaborazio bideak eta instalazioak erakusten ditu. Hiru minutuko iraupena du ikus-entzunezkoak eta oso erakargarri erakusten du Stirling Zentroa.