Debagoieneko Lanbide Heziketaren Azoka Garaian ospatuko da gaur eta bihar

Mondragon Unibertsitatea eta Arizmendi Ikastola, besteak beste, GOIAZ! Azokan izango dira, Debagoieneko Lanbide Heziketaren Azokan. Aipatutako ikastetxe eta unibertsitateez gain, Debagoieneko Lanbide Heziketako beste bost ikastetxek ere parte hartuko dute, baita udalek eta beste erakunde batzuek ere, hala nola; Mankomunitateak, HHEk, Lanekik eta Bastida Akademiak.

GOIAZ! Azokaren helburua da Debagoieneko hezkuntza eskaintzaren berri ematea, eta bereziki, Lanbide Heziketa ezagutaraztea. Parte hartzen duen erakunde bakoitzak informazio-gune propioa izango du gertaratzen diren interesatuak artatzeko.

Azokaren ordutegia honako hau izango da: gaur, asteazkena, goizeko bederatzietatik arratsaldeko zortziak arte eta bihar, goizeko bederatzietatik arratsaldeko ordu bietara. Azoka eskualdeko DBHko eta Batxilergoko ikasleei ez ezik, gurasoei eta/edo tutoreei, langabezian dauden pertsonei eta informazio orokorra nahi duten guztiei zuzenduta dago.

Antolaketa

Antolaketa Debagoieneko Mankomunitateko Garapen Agentziaren esku dago eta Gipuzkoako Foru Aldundiko Ekonomia Sustapen, Turismo eta Landa Ingurunearen Departamentuaren laguntzarekin.