Arimendiarrietaren Lagunak Elkarteak Batzar Nagusia egingo du bihar Garaian

Garaia Parke Teknologikoak (Arrasate, Gipuzkoa) Arizmendiarrietaren Lagunak Elkartearen (ALE) Ohiko Batzar Nagusia hartuko du bihar, maiatzak 15. Hitzordu horrek, urtero bezala, aurreko ekitaldiaren balantzea egiteko eta aldi berriko lan-ildoak zehazteko balioko du.

Batzarra 18:00etan hasiko da, bigarren deialdian, aurreikusitako gai-zerrendari jarraituz. Bertan, 2024ko kudeaketa txostena aurkeztu, 2025erako Kudeaketa Plana onartu eta Zuzendaritza Batzordeko kideen zati bat berrituko da.

Amaitutakoan, 19:00etan, publikoari irekitako ekitaldi batean, Leire Mugerza MONDRAGONeko Kongresuko eta Batzorde Iraunkorreko presidenteak hitzaldia eskainiko du: MONDRAGON: 2028rako ibilbide-orria.

Bere hitzaldian, MONDRAGONen ziklo estrategiko berriaren (2025-2028) gakoak jorratuko ditu Mugerzak. Adostutako plan horren helburua da eredu kooperatiboaren funtsa indartzea, negozioen lehiakortasuna hobetzea eta belaunaldi berriei ondare sendoa uztea.

Gogoratu behar da ALE elkartearen xedea dela "bizirik mantentzea Arizmendiarrietaren figura, haren biografia pertsonala eta inspirazio iturri izan zituen balio humanistak, hark hasitako esperientzia, gizarte ideiak eta ekarpen praktikoak aberastea bultzatuz eta babestuz".