600 ikasle baino gehiago Busturialdean eta Lea-Artibain Zientzia eta Teknologiaren Egunean

TALENTATU proiektuaren baitan, Zientzia eta Teknologia Egunaren edizio berri batek 600 ikasle inguru bildu ditu maiatzean Busturialdean eta Lea-Artibain.

Maiatzaren 15ean, Busturialdeko DBHko 4. mailako 350 ikasle baino gehiago elkartu ziren Gernika-Lumoko Astra eraikinean. Bestalde, maiatzaren 29an, Lea-Artibaiko Lehen Hezkuntzako 6. mailako 250 ikasle inguruk parte hartu zuten Markina-Xemeingo Atxondo kiroldegian egindako jardunaldian.

Lea-Artibaiko ekimenaren bideoa

Busturialdeko ekimenaren bideoa

13 txoko tematikotan banatuta, ikasleek robotika, errealitate birtuala, programazioa, elektronika, bioteknologia eta matematikaren inguruko esperientzia praktikoak izan zituzten. Era berean, inguruko enpresen, zentro teknologikoen eta unibertsitateen jarduera gertutik ezagutzeko aukera izan zuten.

Bokazio zientifiko eta teknologikoak sustatzeko ekimena

Lea-Artibaiko Kooperatiben Mahaia Elkarteak eta Leartibai Fundazioak sustatutako ekimenak eskualdeko enpresen, zentro teknologikoen eta hezkuntza-eragileen parte-hartzea izan zuen.

Jardueraren balorazioa oso positiboa izan da, bai irakasleen aldetik, bai ikasleen aldetik, bereziki jardueren izaera praktikoa eta dinamikoa nabarmenduz.

2019an lehen aldiz ospatu zenetik, Zientzia eta Teknologia Eguna erreferentziazko hitzordu bihurtu da bokazio zientifikoak eta teknologikoak sustatzeko eta gazteei beren inguruko enpresa eta erakundeen errealitatea hurbiltzeko.