Fagor Arrasatek HERPASAren ekoizpen-unitatea erosi du, altzairu herdoilgaitzezko deposituen espezialista

HERPASAk ibilbide luzea du elikadura-, kimika- eta farmazia-sektoreetarako altzairu herdoilgaitzezko biltegiratze eta prozesu-soluzioen diseinuan eta fabrikazioan. Enpresa likidazio-fasean zegoen hartzekodunen konkurtsoa amaitu ondoren, eta horrek ahalbidetu du erosketa hau.

Bezeroei eta martxan dauden proiektuei jarraipena

Fagor Arrasatek HERPASAk martxan dituen proiektu guztiak hitzartutako baldintzetan amaitzeko konpromisoa hartu du. Talde tekniko eta ekoizpeneko langile guztiak mantenduko dira, eta gainera indartu egingo dira. Horrela, markaren bereizgarri izan diren zerbitzuaren jarraipena eta ezagutza espezializatua bermatuko dira.

Hazteko bokazioa duen proiektua

Erosketa honen bidez, Fagor Arrasatek bere jarduera osatzen duen ekoizpen-gaitasun berria gehitzen du, eta proiektuari bere ingeniaritza-gaitasuna, industria-azpiegitura eta nazioarteko merkataritza-sarea eskaintzen dizkio; izan ere, munduko merkatu nagusietan dago presente.

Mikel López Fagor Arrasateko Siderurgia Negozio Unitateko zuzendariak eta HERPASAko arduradun berriak honako hau azpimarratu du:

"HERPASA prestigio handiko marka da bere sektorean, eta balio tekniko handiko ezagutza duen taldea dauka. Gure lehentasuna une honetan martxan dauden proiektuei jarraipena ematea eta bezero guztiei konfiantza transmititzea da. Hortik aurrera, helburua haztea izango da: oinarri teknikoa badugu, eta Fagor Arrasatek baliabideak eta merkataritza-sarea jartzen ditu HERPASA beste maila batera eramateko."

Fagor Arrasateri buruz

Fagor Arrasate, S. Coop., MONDRAGON Korporazioko industria-kooperatiba bat da, metalen konformaziorako eta prozesamendurako soluzioetan espezializatua. Bere jardueren artean daude ebaketa-lerroak, estanpazio-sistemak, konformazio-prozesuen automatizazioa eta metalezko pieza konplexuak fabrikatzeko sistema integralak. Ingeniaritzan eta berrikuntzan duen bikaintasunagatik aitortua, mundu osoko metalen prozesamenduaren hainbat sektoretako bezeroei ematen die zerbitzua.

HERPASAri buruz

HERPASA Espainiako enpresa liderra da altzairu herdoilgaitzezko depositu, tanke eta siloen fabrikazioan —bai fabrikan, bai instalazioetan bertan—, eta elikadura-, kimika- eta farmazia-sektoreetako prozesu-instalazioetarako "giltza eskuan" proiektuak ere garatzen ditu. 1974an sortua eta Castellbisbalen (Bartzelona) egoitza nagusia duena, 45 urte baino gehiagoko esperientzia du prozesu-ingeniaritzako eta galdaragintza industrialeko irtenbideak eskaintzen, bai estatuan bai nazioartean.