MONDRAGON Health-ek MedTech sektorean duen lidergoa indartu du Embega Healthcare kooperatibaren integrazioarekin

MONDRAGON Korporazioak osasun sektorean eta arlo soziosanitarioan duen kooperatiben aliantza estrategikoak, MONDRAGON Health-ek, Embega Healthcare taldean sartu dela iragarri du gaur. Integrazio honi esker, aliantzak Nafarroara zabaldu du bere presentzia geografikoa, eta bere balio-kate industriala osatzea lortu du, azken belaunaldiko gailu medikoak fabrikatzeko oinarrizkoa den inprimatutako elektronikaren teknologia txertatuz.

Embegaren balio bereizgarria gailu mediko ultra-arinak, malguak eta merkeak —hala nola sentsoreak eta wearable-ak— diseinatzeko eta fabrikatzeko gaitasunean datza, elektronika zurrun tradizionala iristen ez den gainazaletan zirkuitu adimentsuak integratuz

Embega Healthcare 50 urtetik gorako ibilbidea duen Embega S. Coop. kooperatibaren osasun-unitatea da. MONDRAGON Health-era batzeak jauzi kualitatiboa ekarri dio aliantzari. Izan ere, kontzeptu kliniko konplexuak Europako araudipean ziurtatutako gailu eskalagarri bihurtzeko gaitasuna du orain. Hori horrela, jatorrizko ekipoen fabrikatzaileentzat (OEM) industria-bazkide estrategiko gisa indartu da.

Embegaren balio bereizgarria gailu mediko ultra-arinak, malguak eta merkeak —hala nola sentsoreak eta wearable-ak— diseinatzeko eta fabrikatzeko gaitasunean datza, elektronika zurrun tradizionala iristen ez den gainazaletan zirkuitu adimentsuak integratuz. Horri esker, pazientearen monitorizazioa modu ez-inbaditzailean eta oso eskalagarrian egin daiteke, erosotasuna zein produkzio-eraginkortasuna optimizatuz.

"Embega Healthcare-en batura mugarri estrategiko bat da eta MONDRAGON Health-ek medikuntza pertsonalizatu eta digitalerantz izan duen bilakaera naturalari erantzuten dio", adierazi du Manuel Sánchez-Lagarejok, MONDRAGON Health-eko presidenteak. "Inprimatutako elektronika malguan duen ezagutza gehituta, Europan erakunde gutxik berdindu dezaketen industria- eta teknologia-gaitasuna eskaintzen diogu merkatuari".

MONDRAGON Health zenbakitan

Teknologia gaitasun hori taldearen emaitza ekonomikoen sendotasunak babesten du. MONDRAGON Healthek 172,8 milioi euroko fakturazio bateratuarekin itxi du 2025eko ekitaldia. Aurreko urtean baino % 4,5 gehiago. Hazkunde horren bultzatzaile nagusia, neurri handi batean, kanpoko merkatuetako proiekzioa izan da. Esportazio bidezko salmentak 33,7 milioi eurokoak izan ziren, urte arteko % 25,4ko hazkundea lortuz.

Gaur egun, nazioarteko negozioak aliantzaren bolumen osoaren % 19,49 hartzen du; esportazio-joera hori enpleguaren sorkuntzarekin osatzen da. Aliantzak 1.736 lanposturekin itxi zuen 2025eko abendua, plantilla agregatuan % 2ko hazkundea izan ondoren, eta enplegu kualifikatuaren motor gisa finkatu da.

MONDRAGON Healthek balio handiko aktiboak ditu dagoeneko, besteak beste, 1.550 metro koadro gela zuri, 500 erreferentzia ziurtatu baino gehiago eta analisi kliniko zein bioteknologikorako azpiegitura sendoa.

Euskadi-Nafarroa osasun-ardatza bultzatzen

Villatuertako (Nafarroa) instalazioetatik, Embegak gaitasun kritikoak eskaintzen dizkio aliantzari elektrodoen eta irudi medikoen ekoizpenean, sentsore piezerresistibo eta elektrokimikoetan, eta hasierako faseko mikrofluidikan, kardiologia, neurologia, podologia eta errehabilitazio aplikazioetarako.

"Embega Healthcare-en batura mugarri estrategiko bat da eta MONDRAGON Health-ek medikuntza pertsonalizatu eta digitalerantz izan duen bilakaera naturalari erantzuten dio", adierazi du Manuel Sánchez-Lagarejok, MONDRAGON Health-eko presidenteak

“MONDRAGON Health-ekin bat egiteari esker, Embegak sektore medikoko ikaskuntza-kurba azkartu dezake. Izan ere, araugintzako ezagutza partekatua eta osasun-eragile gakoekin sare estrategiko bat eskuratu du. Horrek elektronika inprimatuko teknologia balioztatzea errazten du eta berehalako sinergia komertzialak sortzen ditu merkatua menderatzen duten beste kooperatiba batzuekin”, adierazi du Javier Perezek, Embegako merkataritza eta Berrikuntza zuzendariak.

Batura honek Euskadi eta Nafarroa arteko osasun-industria ardatza indartzen du, eskualdea nazioarteko erreferentziazko MedTech berrikuntza-gune gisa kokatuz. Embega Healthcare gehitzeak aliantzaren gaitasuna indartzen du Contract Manufacturing proiektuak erakartzeko.

MONDRAGON Health-i buruz

MONDRAGON Health osasunaren, arlo soziosanitarioaren eta bioteknologiaren esparruetan balioa maximizatzera bideratutako MONDRAGON Korporazioko 10 kooperatibaren aliantza da. Hamar kooperatibak osatzen dute: Bexen Cardio, Bexen Medical, Bihar Homecare, ERREKA, Fagor Healthcare, Gerodan, GSR, Osarten, LKS Next eta berriki sartu den Embega Healthcare. Aliantzak irtenbide integralak eskaintzen ditu, elektromedikuntzatik eta telemedikuntzatik hasi eta etxeko arreta, datuen aholkularitza eta gailu medikoen fabrikazio aurreraturaino.

Embega Healthcare-ri buruz

2022an Embega S. Coop.-eko osasun-dibisio gisa sortua, Embega Healthcare ideia klinikoak merkatuko soluzio bihurtzen espezializatutako industria-bazkidea da. Elektronika inprimatu eta funtzionalean adituak, haien teknologia funtsezkoa da gailu mediko malgu eta jasangarriak garatzeko, hala nola elektrofisiologia, biosentsorika, neurologia eta errehabilitazio arloetan.