LANA eta ETORKI kooperatibek bat egin dute

Etorkizunari anbizioz begiratzen diote, eta horren adierazgarri da maiatzaren 11n Murgan inauguratuko duten lantoki berria. Azpiegitura berriak hazkunde-aukera anitzak ekarriko ditu, berrikuntzan eta eraginkortasunean aurrera egiteko bideak zabalduz. Era berean, eskualdeko garapen ekonomikoan ere ekarpen esanguratsua egitea aurreikusten da.

Hazkunde estrategikoa eta lehentasunak

Kepa Bastidak, LANA S. Coopeko zuzendari nagusiak, azaldu du bat-egiteak jauzi handia dakarrela: “Orain arte genuen egur produkzio gaitasuna bikoizten dugu, gure produktuen kalitatea hobetuz, eta horrela balio erantsi handiagoa duten produktuak ekoitziko ditugu, bezero eta merkatu berrietan sartzeko”.

Era berean, nabarmendu du etapa berri honetako lehentasunak zeintzuk diren: “Instalazio berriak %100ean martxan jartzea eta batu garen bi kooperatibetako kolektiboak kooperatiba bakar bezala funtzionatzea”.

Merkatuan kokapen berria

Ekoizpenari dagokionez, urtean 300.000 m³ egur zerratu eta 60.000 m³ lehortzeko gaitasuna izango dute. Bastidaren hitzetan, helburua argia da: “Europako hegoaldeko zerrategi handiena eta efizienteena izan nahi dugu”.

Gainera, azpimarratu du gaitasun berriek aukera berriak zabalduko dituztela: “Orain arte ezin genituen bezero eta merkatu asko gure inguruan zeuden, eta honek kooperatiba indartsuago bat egiteko aukerak zabaltzen dizkigu”.

“Europako hegoaldeko zerrategi handiena eta efizienteena izan nahi dugu”.

Hornidura eta kalitatea bermatuta

Hornidura bermatzeari dagokionez, kooperatibak kontrol zuzena du lehengaiaren jatorrian: “Guk mendiak erosten ditugu eta ustiapenerako gure talde propioak ditugu; horri esker egurraren hornidura bermatu dezakegu eta behar dugun kalitateko materiala aukeratu”.

Jasangarritasuna eta tokiko apustua

Egurra baliabide jasangarri gisa gero eta garrantzitsuagoa dela nabarmenduta, Bastidak tokiko basoen aldeko apustua defendatu du: “Denok daukagu egurrarekin egindako produkturen bat; zentzurik ba al du produktu hauek urrutiko basoetan ateratako egurrarekin ekoizteak?”. Haren ustez, bertako lehengaien alde egitea funtsezkoa da, beste sektore batzuetan egiten den moduan.

Interkooperazioa, arrakastaren giltza

Azkenik, interkooperazioaren balioa azpimarratu du: “2020 bukaeran hasi ginen lehen bilerak egiten, eta elkarlan horren ondorioz gaur egungo proiektua eraiki dugu”. Gaineratu duenez, “fusio honek gure bi negozioak indartzen ditu eta etorkizunerako prestatzen gaitu”, eta aurreratu du jada “300 langiletik gora eta 150 milioi euroko fakturazioa izango duen kooperatiba baten oinarriak” sendotzen ari direla. “Eta hau hasiera besterik ez da”, ondorioztatu du.

Nahiz eta integrazio-akordioak etorkizunerako urrats estrategikoa ekarri, bi kooperatibek dituzte urteetan zehar errotutako ibilbide propioa eta sendoak. Batasun honen irismena ulertzeko, komeni da LANA eta ETORKIren jatorria eta bilakaera ezagutzea.

LANA: sei hamarkada baino gehiagoko bilakaera egurraren industrian

1960an Oñatin sortua, LANA S. Coop., MONDRAGONeko kooperatiba, hasieran basogintza, abeltzaintza eta esne-jarduerekin lotutako kooperatiba gisa abiatu zen. Denboraren poderioz, enpresak eboluzionatu egin zuen eta egurraren eraldaketan espezializatu zen; 1990eko hamarkadan jauzi erabakigarria eman zuen balio erantsi handiagoko produktuen fabrikazioan zentratuz, hala nola enkofraturako hiru geruzako taulak ekoizten.

Berrikuntzaren, hobekuntza teknologikoaren eta nazioartekotzearen aldeko etengabeko apustuari esker, LANAk bere presentzia Euskaditik harago zabaldu du, sektoreko erreferente gisa sendotuz eta dozenaka herrialdetara esportatuz. Bere ibilbideak kooperatiba-tradizioa, merkatura egokitzeko gaitasuna eta jasangarritasunarekiko konpromisoa uztartzen ditu.

Etorki: berrikuntza eta errotzea baso- eta industria-sektorean

1984an sortu zen Etorki, Murgan (Araba). MONDRAGONeko kooperatiba bat da, zeina egurraren zerratzean eta eraldaketan espezializatua dagoen, bereziki pinu radiatan. Hasieratik, balio-kate osoa modu integralean kudeatzearen alde egin du, baso-jatorritik azken produkturaino.

Bere garapenean, enpresak berrikuntza- eta automatizazio-prozesuak txertatu ditu, hazteko eta merkatuaren eskaera berrietara egokitzeko aukera eman diotenak. Gainera, Etorkik bere jarduera dibertsifikatu du industria-arloan, metalaren sektorerako teknologia handiko produktu urratzaileen banaketan eta aplikazioan oinarritutako lerro batekin, horrela bere posizionamendua eta hazkunde-gaitasuna indartuz.