TUlankide MONDRAGON

Gaztelupen amaitu ditu Arizmendi Ikastolak Batxilergoko espazioen eraldaketa fasea

2019/04/01

Arizmendi Ikastolak (Eskoriatza, Aretxabaleta eta Arrasaten kokatua) konfiantzaren pedagogian jarri du fokoa. Hala, Batxilergoko espazioak arkitektonikoki egokitzen ari da. Arrasaten, Gaztelupe guneko espazioa inauguratu berri dute. Egokitzapen honekin, Batxilergoko espazioen eraldaketa faseari amaiera emango dio Debagoieneko aipatu ikastolak.
Gaztelupen amaitu ditu Arizmendi Ikastolak Batxilergoko espazioen eraldaketa fasea

Konfiantzaren Pedagogiak bide berriak urratzen jarraitzen du: oraingo honetan Gaztelupe gunearen txanda izan da. Berriztapen honekin, aurreko ikasturtean Almen gunean hasitako Batxilergoaren espazio eraldaketari amaiera emango dio Arizmendik.

Arizmendi Ikastolak Gaztelupeko Batxilergoko gunea inauguratu du

Konfiantzaren Pedagogia

2009an abiatu zuen Arizmendi Ikastolak Konfiantzaren Pedagogia eta erabateko eraldaketa planteatu zion bere buruari helburuetan, metodologian eta arkitekturan. Hezkuntza euskaldun kooperatiboa du xedetzat Konfiantzaren Pedagogiak eta arkitekturak rol erabakigarria jokatzen du haren garabidean, bai ikasleak bere buruan konfiantza izan dezan, bai besteengan izan dezan eta baita inguruan ere.

Horren ondorioz, Haur Hezkuntzan dituen sei eraikinetan eraldaketa pedagogikoa eta horri dagokion eraldaketa arkitektonikoa gauzatu zuen ondorengo urteetan. Plan hori 2016an Lehen Hezkuntzara zabaldu zuen Arizmendik eta 2017ko udan Lehen Hezkuntzako maila guztiak hartzen dituen lehen eraikina, Santa Teresakoa, osorik diseinatu eta horren araberako obrak burutu zituen.

Espazioak eta altzariak propio diseinatu dira Batxilergoko gazteek beren burua gestionatu dezaten

 

Gaztelupeko espazioaren inaugurazioarekin, Batxilergoko eraldaketaren bigarren fasea burutu da. Hala, jauzi ikusgarria egingo du Konfiantzaren Pedagogiak Batxilergoan. Gaurdaino Euskal Herrian inork egin ez duen bezalakoa, hain zuzen ere.

Pertsonak garatzeko hezkuntza-diseinua

Espazioak eta altzariak propio diseinatu dira Batxilergoko gazteek beren burua gestionatu dezaten, proiektu kooperatiboak abiatu eta kudeatu ditzaten, ikaskuntza indibiduala, talde txikikoa eta talde handikoa egin ahal izan dezaten, ikasle taldeen arteko partekatze eta lankidetza burutu dezaten, irakasleak eta ikasleak elkar ikusiz eta begiratuz jardun dezaten, solairu osoa denen argitan egon dadin, espazioak erabilera anitz izan ditzan eta giroa naturala eta konfiantzazkoa izan dadin.

Lau ezaugarri dira, Batxilergoko giroak izan behar dituenak: Arkitektura esperientziala. Alegia, arkitekturak agertoki izan behar du, esperientzia ezberdinak bizitzeko gonbitea eginez, eta erabiltzaileari egoera pedagogikoak gertatzeko bidea erakutsiz. Barne zirkulazioa. Alegia, elkarrekintza ezberdinak sortu behar dira, espazioan zehar mugitzeko askatasuna izateko. Ingurune anitzak. Hezkuntza-espazioa inklusiboa izan dadin, eremu txiki eta anitzez osatutako ingurune konplexua izan behar da. Eraikinaren bizitza. Alegia, obrak amaitu ostean, erabiltzaileek inguru berri hori konkistatu behar dute egunerokotasunaren bidez, lekuarekiko erlazio identitarioak sortuz eta egoera berriak eraikiz.

Arkitektura Batxilergoaren liburuaren bigarren edizio eguneratua

Iaz, maiatzaren 24an, Donostian, ARKITEKTURA BATXILERGOAN, KONFIANTZAREN PEDAGOGIA liburua Gipuzkoako Foru Aldundiaren gunean aurkeztu zena eguneratu egin du Arizmendik, bigarren edizioan. Martxoaren 29ko ekitaldian eskura emango da NONDIK, LKS eta EREDU kooperatibekin burutu ostean. Bertan jasotzen dira Gaztelupe gunean egindako berriztapen obren xehetasunak. 

Argazki bilduma

Eguraldia
Astelehena 22 Min: 16
Max: 37
Asteartea 23 Min: 19
Max: 41
Asteazkena 24 Min: 17
Max: 38
Bideoak


+ Bideo gehiago

Papereko edizioa
Jarraitu twitterren
LagunAro

Iradokizunak

iradokizunak