LABORAL Kutxak bat egin du MONDRAGON Hospitality-rekin

LABORAL Kutxak Arrasaten duen egoitza nagusia aukeratu dute finantza-erakundea MONDRAGON Hospitality elkartean sartzeko protokolo-sinadurarako. Elkarte hori hotelen eta sektore soziosanitarioko zerbitzu eta ekipamenduen enpresa hornitzaileen kluster nagusia da.

Elkarteak zortzi enpresa kooperatibo biltzen ditu, eta horiek 4.000 langile baino gehiago eta 500 milioi euroko fakturazioa dituzte. Xabier Egibar LABORAL Kutxako zuzendari nagusia eta Ramon Gómez Ugalde MONDRAGON Hospitality-ko lehendakaria baikor agertu dira elkartearen etorkizunari begira.

Honela mintzatu da Xabier Egibar: «Gure erakundeak betidanik lagundu izan die gure inguruko gizarte- eta enpresa-aurrerapenaren alde lankidetzan aritzeko xedea duten ekimenei, eta MONDRAGON Hospitality proposamen bereizgarria merkaturatzeko borondateak biltzen dituen eredu berritzailea da».

Bestalde, Ramon Gómez Ugaldek bere poza adierazi du, MONDRAGON Hospitality proiektuan LABORAL Kutxa bazkide izateagatik: «LABORAL Kutxa finantza-erakundea gure artean sartuz, ikuspegi integral batetik jorra dezakegu hotelen eta osasunaren esparruetan proposatzen diguten proiektu oro. Finantzaketa funtsezkoa da edozein ekimenetan, eta, orain, LABORAL Kutxaren partaidetzarekin, zirkulua ixtea lortu dugu».

LABORAL Kutxak proposamen esklusibo bat diseinatu du sektore soziosanitariorako banku-zerbitzuen eta aseguru espezializatuen arloko premiak asetzeko, eta 100 milioi euroko finantzaketa-lerro bat emango du datozen 2 urteetan; horietatik, jasangarritasuna eta energia-efizientzia hobetzeko izango dira 25 milioi euro.

Hauek dira MONDRAGON Hospitality osatzen duten enpresak: Enea (diseinuko altzariak), Erreka (ate eta sarbide automatikoak), Gerodan (altzarien proiektu integralak), KREAN (arkitektura eta ingeniaritza, kudeaketa integratua eta proiektuen egituraketa), Fagor Elektronika (telebista interaktiboko eta multimediako sistemak), Ondoan (instalazioen ingeniaritza, mantentzea, CAI eta energia), Onnera Contract (sukalde profesionalen, buffeten eta garbitegien proiektuak) eta LABORAL Kutxa (proiektuen finantzaketa eta aseguruak).