MONDRAGONek kezka agertu du AEBko muga-zergen balizko inpaktuagatik

Komunikazio ofizial batean, MONDRAGONek bere “kezka” adierazi du neurri horiek nazioarteko merkataritzan duten eraginagatik, munduko ekonomia nagusietan duten inpaktuagatik eta ekonomia-jardueran, eskarian zein enpleguan izan ditzaketen ondorio negatiboengatik. 

Oharrean ere epe laburrean, “bizi dugun ziurgabetasuna”, inbertsioak eta sektore garrantzitsuetan hartu beharreko erabakiak moteltzen ari direla adierazten da; eta epe ertainera, “sektore globalizatuetan, erreakzioei adi egongo gara, eta gure bezeroei merkatuen testuinguru berrira egokitzeko estrategietan lagunduko diegu”. 

Edozein kasutan, gaineratzen da, “MONDRAGONek badaramatzala urte batzuk merkatuak dibertsifikatzeko estrategiak bultzatzen, inpaktuak arindu eta beste eskualde batzuetan sor daitezkeen aukerak aprobetxatu asmoz”. 

“Erakunde guztiekin hartueman hurbila eta jarraitua dugu, diagnostikoa partekatzeko, eta prozesu nahasi honetan babes neurri posibleak hartzea bultzatu, enplegua babestu eta beste edozein inpaktu arintzeko”, azpimarratu du Korporazioak.