50 tontor Copreciren 50.urteurrena gogora ekartzeko

2013/09/23

Oier Etxebarria, Jabi eta Juanma Martínez, Iñaki Bengoa eta Eneko Urrizalki debagoiendarrek sekulako balentria burutu zuten ostirala eta zapatu artean. Gure bailarako 50 tontor zeharkatu zituzten eta sei mila metro baino gehiagoko desnibeleko ibilbidea egin zuten 88 kilometrotan barrena. Guztira 19 orduko mendi martxa izan zen "izugarri gogor eta dotorea". Helburua, berriz, bakarra. Copreciren 50.urteurrena ospatzea.

50 tontor Copreciren 50.urteurrena gogora ekartzeko

Javi, Eneko, Juanma eta Oier Aretxabaletara iritsi ondoren Copreciko banderola eta AGA enpresako kamisetarekin eskuetan.

Honen barnean

Ibilbidearen memoria Oier Etxebarriak idatzia

Ostiralean arratsaldeko zazpietan bost lagun, bost abentura zale kementsu elkartu ziren Aretxabaletako Durana kalean, udaletxe zaharrean. Helburu bikoitzarekin elkartu ziren, Copreciren 50.urteurrena ospatu eta mendi martxa 'gogorra' amaitu: 88 kilometro, Debagoieneko 50 tontor, sei mila metro baino gehiagoko desnibela eta ordu askoko astindua.

Bost protagonistak ostiralean, Aretxabaletako udaletxe zaharretik abiatu aurretik.

Ametsa egi bihurtzeko asmoarekin

"Ametsa bihotzean, indarrak gorputzean eta debagoieneko 50 tontor zeharkatzea buruan". Osagai horiekin eta Aretxabaletako parrokiako kanpaiek zazpiak jo zutenean, abiatu ziren bost lagunak Murugainera (eguneko edo gaueko lehenengo tontorra). Oier, Javi eta Juanma atxabaltarrak, Eneko mondragoetarra eta Iñaki gatzagarra. Bostak abiatu ziren ibilbideari aurre egin nahian eta, Iñakik izan ezik, Landan utzi behar izan zuen erritmoari ezin baitzion eutsi, beste laurek 88 kilometroak batera egin zituzten. Laino artean, tontorrez tontor, gau ilunari aurre eginez... kilometroak jaten joan ziren eta zapatuko arratsaldeko ordu bietan iritsi ziren Aretxabaletara, lagunen eta senideen txalo artean. "Ibilbide dotoreari amaiera hunkigarria emanez eta ametsak gauzatuz".

Ibilbidean zehar, indarrak berreskuratzen.

Mendi martxa honekin atxabaltarren eta Copreciren arteko loturak estutu nahi zituen Oier Etxebarria Copreciko lan-bazkideak, eta datozen urteetan jarraipena ematea ez du deskartatzen.