Talentu gaztea eta enpresa-ekosistema uztartuko dituzte TFG-TFM MONDRAGON Sariek bosgarren urtez

TFG-TFM MONDRAGON Sarien bosgarren edizioa abian da, bere balio nagusietako bat finkatuta: maila handiko epaimahai multidiziplinarra. Aurten ere, erreferentziazko 43 erakundetako 66 profesionalek osatuko dute ebaluazio-mahaia. Taldeak hainbat esparrutako adituak biltzen ditu, hala nola industria, finantzak, osasuna, teknologia, I+G, mundu akademikoa eta hirugarren sektorea. Azken ikasturteko unibertsitate-lan eraldatzaileenak aztertu eta saritzeko ardura izango du.

Epaimahaikideen artean sektoreko izen ezagunak daude, besteak beste: Olga Martin, Aclimako zuzendari nagusia; Iñaki Suarez, BAICeko teknologia-arduraduna; Leire Lagunilla, Bizkaia Talenteko berrikuntza-zuzendaria; edo Jon Kepa Gerrikagoitia, BRTAko zuzendari zientifikoa.

70 aditu inguruk osatuko dute aurten ere epaimahaia, akademia, industria, teknologia, osasun, finantza eta hirugarren sektoreko 43 erakunderen ordezkaritzan.

Proiektuan parte hartzen duten erakundeen aniztasunak sarien izaera integratzailea agerian uzten du, unibertsitatearen eta lan-ingurunearen arteko zubiak eraikitzea baita helburu nagusia. Babesleen artean ekimena bultzatzen duten zortzi kooperatibak daude: Danobatgroup, Fagor Taldea, Laboral Kutxa, MONDRAGON, MONDRAGON Health, Ikerlan, Eika eta Mundukide. Horiekin batera, prozesuan arituko dira Eroski, Copreci, Fagor Arrasate, LKS Next, Bexen, GSR eta Emun bezalako kooperatibak; Leartiker, BC3, IDEKO edo BRTA ikerketa-zentroak; EHU, Deustu, UPNA eta Mondragon Unibertsitatea; Ekonomisten Euskal Elkargoa edo Konfekoop bezalako aliantzak; eta Oxfam Intermon bezalako hirugarren sektoreko erakundeak.

Bost erronka nagusi eta zeharkako sariak

Lehiaketak 26.250 euroko poltsa banatuko du saritan, XXI. mendeak dituen bost erronka nagusien inguruan egituratuta: eraldaketa digitala, pertsonetan oinarritutako eraldaketa, energia- eta klima-erronka, osasun- eta zaintza-berrikuntza, eta inpaktu soziala helburu duten finantzak. Kategoria horiez gain, MONDRAGONen nortasun-ezaugarri diren zeharkako hiru sari emango dira: berrikuntza eta ekintzailetza, eragin soziala, eta euskarazko ezagutza sortzea. Kategoria bakoitzak kooperatiba babesle batek bultzatzen du, gizartean aldaketa positiboak eragiteko benetako ahalmena duten proiektuak identifikatzeko.

Diru-sariaz gain, irabazleek MONDRAGONeko ekosistema kooperatiboan murgiltzeko aukera izango dute, kooperatibetara bisitak eginez eta bertako profesionalekin sareak eraikiz. Amaia Zubizarretak, sarien koordinatzaileak, prestakuntza akademikoaren eta enpresa-garapenaren arteko lotura horren garrantzia azpimarratu du: "Talentu gazteak bere ideiak baliozkoak izateaz gain, etorkizun justuago, jasangarriago eta berritzaileago bat eraikitzeko ezinbestekoak direla senti dezan nahi dugu. Horrekin batera, ideietatik errealitatera salto egiteko bideak bilatzen ahalegintzen gara, ezagutza hori gure proiektu sozioenpresarialetan txertatuz edo gizarteratzeko bideak bilatuz”.

Hautagaitzak eta egutegia

Deialdia irailaren 30era arte egongo da zabalik. Parte hartu ahal izango dute 18 urtetik gorako pertsona guztiek, baldin eta euren MAL edo GALa 2025eko urriaren 1etik 2026ko irailaren 30era bitartean defendatu badute, gutxienez 10etik 8ko nota lortu badute eta lana lehiaketako bost gai-kategorietako batekin lotuta badago.

Deialdiaren xehetasun guztiak eta izena emateko formularioa TFG-TFM MONDRAGON Sariak 2026 webgune ofizialean daude eskuragarri. Edizio honi amaiera emateko, sari banaketa ekitaldia eta saretze-jardunaldia datorren azaroaren 27an ospatuko dira.