Lea Artibai Ikastetxeak gazteak laneratzeko programa aitzindaria jarri du abian

Lea Artibai Ikastetxeak bere eskualdeko langabetuen laneratze aukerak hobetzeko proiektu berritzailea aurkeztu du. "Garantía Juvenil" sisteman izena emanda dauden 16 eta 29 urte bitarteko gazteei zuzendutako proiektu berritzailea da Lehen Job Lab, eta Europako Gizarte Funtsaren finantzazio partekatuan 2014-2020 Gazte Enplegurako Programa Operatiboaren (tarte autonomikoan) esparruan kokatzen da.

16 eta 29 urte bitarteko gazteei zuzendutako proiektu berritzailea da Lehen Job Lab

Proiektua dohaineko prestakuntzarako programa batean datza eta azken helburua parte-hartzaileen %80a laneratzea da. Horretarako inguruko enpresekin elkarlana ezinbestekoa da, prestakuntza bukatzen dutenentzat praktikak eta lan-kontratuak egitea ahalbidetuko dute eta.

9 hilabeteko kontratua eta praktikak enpresetan

Programaren hasieran Lea Artibai Ikastetxeko orientatzaileek interesatuekin elkarrizketa egingo dute, proiektuak dituen lerro ezberdinetatik bakoitza zeinetan kokatzen den definitzeko; azken helburua beti ere, lana aurkitzeko aukerak handitzea izango da. Hautatutako pertsonek 120 orduko ikastaroa izango dute eta bertan ondokoak landuko dira: konpetentzia sozialak, pertsonalak eta emozionalak, enpresarialak eta kudeaketarako konpetentziak. Edukien artean, erabakiak hartzeko gaitasuna, lan-taldean aritzea, sormena eta komunikazioa landuko dira besteak beste.

Hasierako prestakuntza saio hauen ondoren, konpetentzia teknikoen garapena etorriko da. Kasu horretan berariazko prestakuntza jasoko dute parte-hartzaileek eta ondoren praktika egingo dituzte enpresetan. Proiektuan bederatzi hilabeteko kontratuarekin lotuta datozen bi espezialitate nabarmentzen dira: mekanika, alor horretan gaitasunak dauzkaten pertsonentzat, eta berrikuntza esparruan, alor horretan teknikari moduan prestatu nahi direnentzat. Halaber, parte-hartzaileen profilaren arabera ibilbide osagarriak ere badaude proiektuan.