Negoziorako duen erabilgarritasuna ukaezina da: datuen analisia erabakiak hartzeko euskarri gisa, optimizazioak, iragarpenak, automatizazioak, edukiak sortzea. Erabilera kasuak ugariak dira, eta gure erakundeetan IA ezartzeari uko egiteak aukerak eta lehiakortasuna galtzea ekarriko luke.

Eta, hala ere, BAICeko estrategia zuzendari naizen aldetik, begirada grinatsu eta kritiko batez bizi dut iraultza hau. IAk Euskadiko erakundeen alde zer egiten duen eta gure lurraldean zer eragin izaten ari den ikusten dudalako grinatsua, eta kritikoa, konturatu gabe gure pentsamendua IAren esku utz dezakegulako, Pensilvaniako Unibertsitateko Whartongo Negozio Eskolako ikertzaileek ‘uko kognitiboa’ deitu dutena. Haien azterketaren arabera, kasuen erdietan baino gehiagotan, baita akatsak daudenean ere, ez da azterketa kritikoa egiten.

“Etorkizuna irudikatzen dudanean, ez dut imajinatzen IA gabe, inozoa izango litzateke, baina bai imajinatzen dut IA bere lekuan dagoela: kopilotu gisa, inoiz ez pilotu gisa”

Horregatik, etorkizuna irudikatzen dudanean, ez dut imajinatzen IA gabe, inozoa izango litzateke, baina bai imajinatzen dut IA bere lekuan dagoela: kopilotu gisa, inoiz ez pilotu gisa. Gure lana sustatzen duen laguntza gisa ikusten dut, eta ez gure irizpidearen ordezko gisa. Bi aukeren arteko aldea ez du teknologiak markatuko, maila pertsonalean eta antolaketa mailan erabiltzea erabakitzen dugun heldutasunak baizik.

Antolamenduari dagokionez, BAICetik bultzatzen dugu enpresek IA erabiltzeko politika argiak hartzea, nork berrikusten duen, nor den arduraduna, zer informazio partekatzen den eta ezagutzaren balioa ez galtzeko zer tresna diren egokienak eta nola bermatzen dugun segurtasuna.

Gure taldeak prestatzea eta gaitzea ezinbestekoa da inor atzean ez uzteko eta tresna horiek irizpideekin erabili ahal izateko. Baina politikez eta prestakuntzaz harago, IA irizpidez integratzeak gure erakundeetan aldaketa kulturala eta birpentsatzeko gaitasuna eskatzen ditu. Izan ere, ez gaude beste proiektu teknologiko baten aurrean, eraldaketa baten aurrean baizik.

Gure esku dago pentsatzeko guneak zaintzea eta gure irizpideari uko ez egitea. IAk ez digu gutxiago pentsatzeko eskatzen, hobeto pentsatzeko baizik.