Irakurriena
- 1. Adolfo Plaza: «Gure entitatearen asmoa da gizartearentzako aurrerapen bateratua lortzea, inor atzean utzi gabe»
- 2. Danobatek 20 milioi euro inbertitu ditu Elgoibarko egoitzan berrian
- 3. LABORAL Kutxa Frantziako Tourrean izango da
- 4. Gipuzkoako Bazkundeak saria eman dio MLAKoop kooperatibari
- 5. Arkaitz Etxezarreta, Errekako zuzendari nagusi berria
- 6. “Gizarte hobe bat sortzea, hori da gure utopia eta, gure inperfekzio guztiekin, utopia hori lurreratzen saiatzen gara”
- 7. Espainiako Bankuko gobernadoreak MONDRAGON bisitatu du
- 8. Errekak Darwin Biomed startuparekin bat egin du, Health linea bultzatzeko helburuarekin
- 9. Ingeniaritza eta Zerbitzuen Dibisioa Advanced Factories-en egongo da
- 10. Arizmendi ikastola, 20 urte
Euskadi berrikuntza handiko Europako eskualde gisa indartu da
Europako Batzordeak argitaratu berri duen “Regional Innovation Scoreboard (RIS) 2023” txostenean jasotzen denez, Euskadi berrikuntza handiko Europako eskualdeen artean dago, 2016. urteaz geroztik %11,5 hazi baita bere berrikuntza-errendimendua.
EBko batez bestekoarekiko berrikuntzako errendimenduaren hobekuntza oso nabarmena da (% 103,6tik % 109,8ra). Ondorioz, Euskadik 21 postu hobetu ditu, 93. postutik 72. postura, Europako 239 eskualde berritzaileetan, informazio publikoa duten adierazle guztien hobekuntza orokorrari esker.
"Regional Innovation Scoreboard"-ek Europako eskualdeetako berrikuntza-sistemen jarduna neurtzen du, eta arlo horretako nazioarteko erreferentzia nagusitzat jotzen da.
Eskualde gehienak beren estatuaren berrikuntza-kategoria berekoak edo beheragokoak dira. Hala ere, Euskadi berrikuntza handiko eskualdea da berrikuntza-estatu moderatu batean. Hori dela eta, Europako Batzordeak "bikaintasunaren polotzat" jo du Euskadi (pocket of excellence). Hori da eskualde gutxi batzuen kasua, adibidez, Txekiako Praga eskualdea; Italiako Trento probintzia autonomoa, Friul-Venezia Julia edo Emilia-Romaña; edo Hungariako Budapest eskualdea.
Euskadiko jarduera berritzaileak ia % 10 gainditzen du Europar Batasuneko batez bestekoa (+%9,8). Halaber, Estatuko batez bestekoaren (+%23) oso gainetik dago, lidergoan gainerako autonomia-erkidegoen aldean.
Indargune nagusiak berrikuntzak produktu berrien salmentan duen inpaktuan eta gazteen kualifikazio altuan datza. Halaber, diseinu komunitarioen berrikuntza babestearekin lotutako erronka batzuk aurkezten dira.
Berrikuntza handia berrikuntza-egoera moderatu batean
Txostenak azaltzen duenez, berrikuntza handiko eskualdeak berrikuntza handiko herrialdeetan aurkitu ohi dira. Hala ere, berrikuntza moderatuko herrialdeetan kokatutako "bikaintasun-polo" batzuk ere aurki daitezke, hala nola Euskadi Espainiako Estatuan.
Euskadi da ranking horretan ondoen kokatuta dagoen Estatuko Autonomia Erkidegoa, eta erreferentziazko beste eskualde batzuen gainetik dago, hala nola Madril, Katalunia eta Nafarroa, "berrikuntza handiko eskualde" gisa katalogatzen baitira. Gainera, edizio honetan bigarren eskualdearekiko puntuazioa hobetu du, Madrilgo Erkidegoarekiko. Zehazki, 2021ean bere puntuazioa 2,6 ehuneko-puntu handiagoa zen Madrilgoarena baino, eta edizio honetan ehuneko 3,2 puntura igo da. Ia herrialde guztietan eskualde berritzaileena herrialdeko hiriburua izaten da. Hala ere, Euskadi salbuespena da, bere berrikuntza-maila Madrilgo Erkidegoa baino handiagoa baita. Kasu hori oso egoera gutxitan gertatzen da, adibidez, lehen aipatutako Italiako eskualdeetan, Alemaniako Bavaria Garaian edo Belgikako Flandesen.