LagunAro, EPSVk dotoreziaz ospatzen ditu urrezko ezteiak

Gizarte babeserako entitateak 50 urte betetzen ditu aurten. Ospatzeko ekitaldiak pasa den ostiralean hasi ziren eta gaur ere izango da beste festa txiki bat.
Card image cap
2017/07/10

Lagun Aro, EPSVk 28.000 mutualistari eta 13.000 pentsioduni ematen die estaldura, eta aurten urrezko ezteiak ospatzen ditu. Aukera hori aprobetxatuta dotoreziaz jantzi da erakundea eta horren adibide ederra erakutsi zuen pasa den ostiralean, uztailaren 7an Arrasaten egin zuen ekitaldian.

LagunAro 50 urteurreneko ekitaldia

Oroitzapenezko ekitaldian izan ziren, besteak beste: Iñigo Urkullu Jaurlaritzako Lehendakaria; MONDRAGON Korporazioko lehendakaria, Iñigo Ucín; Gipuzkoako ahaldun nagusia, Markel Olano; Lana eta Justizia sailburua, María Jesús San José; eta Arrasateko alkatea den María Ubarretxena.

Carlos Maza, LagunAro, EPSVko idazkariak egin zuen aurkezpen lana. Hasiera emateko, Aukeran dantza taldeko dantzariek ohorezko aurreskua eskaini zuten eta ondoren Jose Antonio Alustizak hartu zuen hitza, entitateko lehendakariak. Jarraian, LagunAron lana egin duen eta jubilazioa hartu berri duen pertsona batek protagonizatu duen bideo hunkigarria proiektatu zen. 

LagunAro 50 urteurreneko ekitaldia

Omenaldi sentikorra

50. urteurrena betetzen den une honetan, ibilbide luzean bidelagun izan diren pertsona guztiak aintzat hartuta, ostiraleko ekitaldian honako pertsona hauek jaso zuten omenaldi berezia: Román Balanzategui, Jesús Goienetxe eta José Antonio Ajuria lehendakari ohiak; zuzendari nagusiak izan ziren José Ayala (hilda), Eduardo Arana, Xabier Elizondo eta Julio Gallastegui (azken bi hauek ez ziren bertaratu); Kontseilu Orokorreko kide izan direnak eta hauen guztien izenean Juan Larrañaga eta Juan Domingo Gaztañaga, eta baita José María Ormaetxea eta Alfonso Gorroñogotia, esperientzia kooperatiboaren fundatzaileak izan zirenak eta  José María Arizmendiarrietaren kolaboratzaileak. 

LagunAro 50 urteurreneko ekitaldia

Ekitaldiari amaiera emateko Iñigo Urkullu Lehendakariak hartu zuen hitza eta aukera aprobetxatu zuen LagunAro, EPSV zoriontzeko eta urte hauetan guztietan egin duen lana goraipatzeko, batik bat momentu txarrenetan eman duen erantzuna.

Ospakizunak ez ziren ostiralean bukatu, eta larunbatean familien arteko ekitaldia egin zuen. Horrez gain, gaur bertan, arratsaldeko 6etatik aurrera beste ekitaldi bat egingo dute, LagunAro, EPSVko hornitzaile eta kolaboratzaileekin.

Ekitaldiko argazki gehiago: https://www.flickr.com/photos/tulankide/albums

Kooperatibisten babes soziala