ETBk grabatutako Gabon kontzertuaren protagonista izango dira aurten "Humanity at Music, Sinfonia Kooperatiboa" eta MONDRAGON

Kontzertua Arantzazuko Santutegian grabatu zen iragan zapatuan, abenduak 14, eta ETBk abenduaren 24an emitituko du, 21:00etatik aurrera.
2019/12/16

Beste gabon kanta batzuen artean, protagonismo berezia hartu zuen MONDRAGON korporazioak aurten garatutako Humanity at Music, Sinfonia kooperatiboa proiektuak, izan ere, hiru kanta: Bi hanka, Let´s suppose eta Banan banan interpretatu zituzten ETBk zapatuan grabatutako Gabon Kontzertuan. Arantzazuko Santutegian (Gipuzkoa) izan zen grabaketa, arratsaldeko zazpietan.

IMG_3083

Gabon kanta guztiak, gehienak oso klasikoak, Hator-hator, Oi Bethleem, Adeste Fideles eta Olentzero, esaterako, Fernando Velazquez musikariak egokitu zituen kontzertu berezirako eta ikusleek izugarri gozatu zuten. 

Musika arloari dagokionez, honako abesbatzak parte-hartu zuten ekitaldian: Aretxabaleta Abesbatza, Oñatiko Ganbara Abesbatza, Arrasateko Goikobalu eta Goikobalu Txiki, Aretxabaletako Leizarra Musika Eskola eta Azkoitiko Musika Eskola. Gainera, 'Sapere aude sinfonietta' musika taldeak jarri zion erritmoa kontzertuari.

ETB1en emanaldia

Kontzertua ETBk grabatu zuen bere osotasunean eta abenduaren 24an ikusi eta entzun ahal izango da, ETB1en, gaueko bederatzietatik aurrera, Gabonetako Oholtzan saio berezian. Grabaziora jende ugari gerturatu bazen ere, Arantzazuko Santutegia ez zen bete kontzertuaz gozatzeko.