2012ko Gestio Plana MONDRAGONen: ikuspegiak

MONDRAGON taldeko zuzendariak eta lehendakariak (eskubian) bildu ziren azaroaren 7an eta 14an 2012rako aurreikuspenak aztertzeko. Ez du ematen 2012an panorama asko hobetuko denik, eta beraz, egoera horretara egokitzeko ahaleginak egitea izan zen gomendiorik entzunena.
2011/12/12

Azaroaren 7an zein 14an egindako jardunaldietan MONDRAGONeko presidente Jose Mari Aldekoak adierazi zuen Korporazioaren desioa eta nahia dela datorren urtean saio bakarrean presidente eta kudeatzaile guztiak elkartzea. Aldekoaren esanetan, oso garrantzitsua izango da elkarrekin mezuak konpartitzea eta errealitateari aurre egitea,"egunerokoan eskutik joan beharra dago, egoeraren azterketa konpartituz eta soluzio bideak elkarrekin hartuz, arlo ejekutiboak eta sozialak", gaineratu zuen Taldeko presidenteak.

Askotariko ekarpenak taldekako saioetan

Zeintzuk dira oinarrizko klabeak politika sozio-enpresariala kooperatiba bakoitzean arrakastaz ezartzeko? Galdera hori abiapuntu hartuta, hausnarketa saio laburrak egin zituzten kudeatzaile eta presidenteek, eta askotarikoak izan ziren saio horietatik irtendako ekarpenak. Lidergoa, misio konpartitua, parte-hartzearen sentimendua, ardura… asko izan ziren sortutako ideiak eta proposamenak.

Presidente zein gerenteen lan saioetan antzeko konklusio eta ekarpenak izan ziren. Oro har, batzuek zein besteek adierazi zuten etorkizunera begira organo sozialak eta zuzendaritza bateratu beharko direla diagnostikoetan eta planteamenduetan. Bazkideari informazioa hedatzeko, proiektuan gehiago inplikatzeko ahalegina eskatuz eta etorkizuneko erronkei elkarrekin aurre egiteko.