2017-12-18T19:41:58+01:00

Tresna pertsonalak

TUlankide MONDRAGON

MUk Ate Irekien jardunaldiak egin ditu bere hezkuntza-eredua ezagutarazteko

2013/02/02

Jardunaldi bakoitzak bi ordu inguru iraungo du eta, horietan, bakoitzak bere eskaintza akademikoa eta titulazioak zehatz-mehatz aurkeztuko ditu. Titulazioen koordinatzaileekin solasean aritu eta zalantzak argitu, instalazioak aurrez aurre ezagutu eta Mondragon Unibertsitatean gaur egun garatzen ari diren proiektu batzuk ezagutu ahal izango dira jardunaldietan.
MUk Ate Irekien jardunaldiak egin ditu bere hezkuntza-eredua ezagutarazteko

MUren Arrasateko campusa.

Mondragon Unibertsitateak ateak zabaltzeko jardunaldiak egin ditu bere campusetan, bere hezkuntza-eredua ezagutarazteko xedez. Unibertsitate aurreko jardunaldi bakoitzak bi ordu inguru iraungo du eta, horietan, fakultate bakoitzak bere eskaintza akademikoa eta titulazioak zehatz-mehatz aurkeztuko ditu. Zehazki, Goi Eskola Politeknikoan, jardunaldia 10:30ean izango da, Arrasateko campusean. Bestalde, Enpresagintza Fakultateak 11:00etan egingo du berea, Oñatiko campusean. Azkenik, Humanitate eta Hezkuntza Zientzien Fakultateak bi deialdi egin ditu, biak ere 11:00etan: bata Eskoriatzako campusean, non Haur Hezkuntza eta Lehen Hezkuntza ematen duen, eta bestea Aretxabaletako campus berrian, aurtengo ikasturtean estreinatu baitu Ikus-entzunezko Komunikazioa emateko.

Ateak zabaltzeko jardunaldiak Mondragon Unibertsitatea aurrez aurre ezagutu nahi duten etorkizuneko unibertsitarioei zein guraso, irakasle eta bideratzaileei zuzenduta daude. Izan ere, jardunaldiotan, fakultate bakoitzak bere zentroetan eskainitako titulazioak zehatz-mehatz ezagutarazi eta bisitariek izan ditzaketen zalantzak argituko ditu. Mondragon Unibertsitatearen ezaugarriak nabarmendu egingo dira topaketa horietan: enpresekin dituen harremanak, ikasketak eta lana bateratzeko aukera, hezkuntza-eredua, nazioarteko mugikortasuna eta karrera-bukaerako proiektuak, besteak beste.

Unibertsitate aurreko orientazio-jardunaldiak osatzeko, Mondragon Unibertsitateak bere hezkuntza-eredua aurkeztuko du Euskal Autonomia Erkidego osoko ehun ikastetxetan baino gehiagotan.

Jardunaldi horien inguruko argibide gehiago jasotzeko, Mondragon Unibertsitatearen webgunera jo daiteke: www.mondragon.edu/prest edo telefono honetara deitu: 902 110 436.


Bideoak


+ Bideo gehiago

Papereko edizioa
Jarraitu twitterren
LagunAro

Iradokizunak

iradokizunak